Mərakeşdə ərəb dilinin gücləndirilməsi və təhsil, idarəetmə və müxtəlif sektorlarda fransız dilinin dominantlığına son qoyulması çağırışı edilib.
Elchi.az xəbər verir ki, Ərəb Dili üzrə Mərakeş Milli Koalisiyası 18 dekabr Dünya Ərəb Dili Günündə yayımladığı bəyanatda ölkədə daha inklüziv linqvistik gələcəyin yalnız həyatın bütün sahələrində ərəb dilinin rəsmi statusunun effektiv şəkildə tətbiqi ilə mümkün olduğunu vurğulayıb.
Bəyanatda deyilir ki, bunun üçün ərəb dilini təhsil, idarəetmə, maliyyə, biznes və digər həyati əhəmiyyətli sektorların əsas dili edən aydın və birmənalı dil siyasətinin qəbul edilməsi, eyni zamanda fransız dominantlığına son qoyulması tələb olunur.
Koalisiya həmçinin dövlət qurumlarından və özəl şirkətlərdən rəsmi yazışmalarda, göstərilən xidmətlərdə və sənədlərdə ərəb və ya amazig (Berber) dilinin məcburi istifadəsi ilə bağlı hüquqi qaydalara riayət etmələrini tələb edib.
Ölkədəki vətəndaş cəmiyyəti təşkilatları bəzi dövlət qurumları, QHT-lər və banklar tərəfindən fransız dilindən davamlı istifadəni tənqid edir.
“Ərəb dili dövlətin rəsmi dilidir”
Mərakeş Konstitusiyasının 5-ci maddəsində deyilir ki, “Ərəb dili dövlətin rəsmi dilidir və dövlət onun qorunması, inkişaf etdirilməsi və istifadəsinin təşviqi üçün çalışmalıdır. Amaziğ dili həm də dövlətin rəsmi dilidir, çünki istisnasız olaraq bütün mərakeşlilərin ortaq irsidir.”
Digər tərəfdən, bəzi fənlərin fransız dilində tədris olunmasına icazə verən təhsil islahatı qanunu 2019-cu ilin avqust ayında qüvvəyə minib. Bu qayda, təhsildə fransız dilinin istifadəsinə qarşı çıxan siyasi partiyaların və vətəndaş cəmiyyəti təşkilatlarının reaksiyalarına və müzakirələrinə səbəb olub. Onlar fransız dilinin keçmiş müstəmləkə dili olduğuna görə təhsildə istifadəsinə qarşı çıxıblar.
Şayəstə
