“Bu yaxınlarda Azərbaycan Ermənistana hər iki tərəfin yekun sülh sazişi hazırlamağa başlaya biləcəyi beş prinsip təklif edib. Ancaq Ermənistan bu və digər normallaşma təkliflərindən yayınmağa, süründürməçilik etməyə davam edir”.
Elchi.az-ın xəbərinə görə, bunu Böyük Britaniya Parlamentinin Azərbaycan qrupunun sədr müavini Lord Kilkluni nüfuzlu “PoliticsHome” saytında yazdığı Azərbaycan və Ermənistan arasında post-münaqişə vəziyyətinə dair məqaləsində deyib. O bildirib ki, 2020-ci ildə hərbi əməliyyatlar başa çatdıqdan sonra Azərbaycan münasibətləri normallaşdırmaq və həm azərbaycanlıların, həm də ermənilərin xeyrinə regionun yenidən qurulması ümidi ilə Ermənistana dostluq əlini uzadıb.
“Bu yaxınlarda Azərbaycan Ermənistana hər iki tərəfin yekun sülh sazişi hazırlamağa başlaya biləcəyi beş prinsip təklif edib. Ancaq Ermənistan bu və digər normallaşma təkliflərindən yayınmağa, süründürməçilik etməyə davam edir. Ermənistan Azərbaycandan gələn təklifi qəbul etməli və beynəlxalq prinsiplər, o cümlədən ərazi bütövlüyü, suverenliyi və sərhədlərinin toxunulmazlığının tanınması əsasında tam normallaşmaya nail olmaq üçün ciddi və əsaslı dialoq aparmalıdır. Burada Böyük Britaniya da hər iki tərəfi müsbət və konstruktiv şəkildə məşğul olmağa təşviq edərək, bu normallaşmaya töhfə vermək üçün əlindən gələni etməlidir”.
Lord Kilkluni məqaləsində Ermənistanın 2020-ci ildə üç ölkə arasında imzalanan sazişi pozaraq regional nəqliyyat marşrutlarının və Zəngəzur dəhlizinin açılmasına mane törətməyə davam etdiyini də bildirib: “Mən Böyük Britaniyanın maraqları üçün həyati əhəmiyyət kəsb edən Cənubi Qafqaz regionunun yenidən qurulması cəhdlərini qətiyyətlə dəstəkləyirəm. Rusiya və Ukrayna arasındakı gərginlik, Ermənistan və Azərbaycan arasında olan münaqişə də daxil olmaqla, davamlı həll yollarının yaradılmasının vacibliyini nümayiş etdirir”.
Lord Kilkluni Ermənistanın partlamamış qurğular nəticəsində onlarla mülki şəxsin ölümünə və yaralanmasına səbəb olan dəqiq mina xəritələrini və digər müvafiq məlumatları Azərbaycana təqdim etmədiyini xatırladıb. O bildirib ki, bu beynəlxalq humanitar hüquq öhdəliklərinin açıq şəkildə pozulması deməkdir. Lord Kilkluni qeyd edib ki, Ermənistan Azərbaycanın 1990-cı illərdəki hərbi əməliyyatlardan sonra itkin düşmüş 4 000 azərbaycanlının yeri ilə bağlı məlumatların bölüşdürülməsi tələblərinə də susurlar.
Məqalədə həmçinin 1990-cı illərdə Ermənistan və Azərbaycan arasında hərbi münaqişələr haqqında da məlumat verilib. Bildirilib ki, bu münaqişələr Ermənistanın Azərbaycanın beynəlxalq səviyyədə tanınmış ərazilərinə, o cümlədən Dağlıq Qarabağa genişmiqyaslı hərbi müdaxiləsi nəticəsində baş verib.
Lord Kilkluni məqaləsində 1992-ci ilin fevralında Xocalı şəhərində 600-dən çox insan, o cümlədən qocalar və uşaqlar da daxil olmaqla, dinc əhali vəhşicəsinə qətlə yetirildiyini qeyd edib. Bildirib ki, bu da Ermənistanın işğal etdiyi Azərbaycan ərazilərində həyata keçirdiyi sistematik etnik təmizləmə siyasətini əks etdirir: “Ermənilərin hərbi təcavüzü nəticəsində bir milyona yaxın azərbaycanlı öz yurd-yuvasını tərk edərək öz ölkələrində məcburi köçkün vəziyyətinə düşməyə məcbur olub”.
O bildirib ki, Ukraynadakı hazırkı vəziyyət Ermənistan-Azərbaycan münaqişəsinin davamlı həllinin vacibliyini nümayiş etdirir.
“Ərazi bütövlüyünün və suverenliyinin qorunmasına tam sadiq bir ölkə kimi Azərbaycan Ukrayna xalqını 10 milyon avrodan çox dəyərində həyati vacib tibbi ləvazimatlarla təmin etməklə yanaşı, Ukrayna və Rusiya arasında birbaşa danışıqların Bakıda keçirilməsini təklif edib. Bu, Rusiyanın Cənubi Qafqazdakı ən yaxın müttəfiqi olan, öz ərazilərində iki Rusiya hərbi bazasına ev sahibliyi etməkdə davam edən Ermənistanın siyasəti ilə kəskin ziddiyyət təşkil edir”, – deyə məqalədə qeyd edilib.
Son şərhlər