İsrail Birləşmiş Millətlər Təşkilatına (BMT) üzv olan 90-dan çox ölkənin imzaladığı və Təl-Əvivin Fələstinə qarşı son sanksiyalarını rədd edən bəyannaməni mənasız adlandırıb.
Elchi.az xarici mediaya istinadən bildirir ki, İsrailin xarici işlər naziri Eli Koen sosial media hesabından Almaniya, Fransa və İtaliya kimi 27 Avropa ölkəsi, həmçinin Ərəb Liqası və İslam Əməkdaşlıq Təşkilatına (İƏT) üzv olan 90-dan çox ölkənin imzaladığı bəyannaməyə reaksiya verib.
Koen paylaşımında qeyd edib:
“Mənasız bəyanatlar və imzalar düzgün qərarlar qəbul etməyimizə, vətəndaşlarımızı qorumağa və gələcəyimizi təmin etməyə mane olmayacaq. Dünyadakı bütün ölkələrin marağı Fələstin rəhbərliyinin təxribatlarının qarşısını almaq olmalıdır”.
Fələstin BMT Nümayəndəliyinin Twitter hesabında yayılan birgə bəyanatda deyilir:
“BMT-yə üzv dövlətlər olaraq, beynəlxalq sistemimizin təməl daşları olan Beynəlxalq Ədalət Məhkəməsinə (ICJ) və beynəlxalq hüquqa sarsılmaz dəstəyimizi bir daha təsdiqləyirik”.
İsrail hökumətinin Fələstin xalqına, onların liderlərinə və qeyri-hökumət təşkilatlarına qarşı cəza tədbirlərinin həyata keçirilməsindən narahat olduğu vurğulanan bəyanatda, Təl-Əvivin Fələstin xalqına qarşı cəza tədbirləri həyata keçirməsinin qəbuledilməz olduğu bildirilib.
İsrailin Fələstinə qarşı sanksiyaları
2022-ci il dekabrın 31-də BMT Baş Assambleyası Beynəlxalq Ədalət Məhkəməsindən İsrailin Fələstin ərazilərini işğalının hüquqi nəticələrinə dair məsləhət rəyi verməsini tələb edən qətnamə qəbul edib.
İsrail hökuməti isə bu vəziyyətə reaksiya vermiş və yanvarın 6-da Fələstinə vergi fondlarından təxminən 39 milyon dollar kəsilmək və bu pulun 2009-cu il üçün yaradılmış fonda köçürülməsi də daxil olmaqla 5 bəndlik sanksiya qərarı tətbiq etmək qərarına gəlib.
Yeganə
Son şərhlər