Azərbaycan ikinci dəfədir ki, İslam İnkişaf Bankı Qrupunun (IsDB) illik toplantısına ev sahibliyi edir. Bu addım tərəfdaşlığın miqyasını və sıx əməkdaşlığın səviyyəsini bariz şəkildə nümayiş etdirir.
Elchi.az xəbər verir ki, bunu Azərbaycan Respublikasının Prezidenti İlham Əliyev Bakıda keçirilən İslam İnkişaf Bankı Qrupunun 2026-cı il üzrə İllik Toplantılarının açılış mərasimindəki çıxışı zamanı bildirib.
Dövlət başçısı ölkəmizin ilk dəfə ev sahibi olduğu 2010-cu ili çox yaxşı xatırladığını qeyd edib:
“Həmin illik iclas qrupla tərəfdaşlığımıza, həmçinin Azərbaycanın iqtisadiyyatı şaxələndirmək, islahatlar aparmaq və enerji sektorundan asılılığı azaltmaq məqsədilə həyata keçirdiyi islahatlara güclü təkan verdi”.
Prezident İlham Əliyev həmin vaxtdan bəri həm Azərbaycanda, həm də regionda çox şeyin dəyişdiyini, lakin ölkəmizin sabit və uğurlu inkişaf xəttinin dəyişməz qaldığını vurğulayıb:
“Bu isə apardığımız siyasətin – milli maraqlarımıza əsaslanan, qlobal beynəlxalq arenadakı bütün tərəflərlə yaxşı münasibətlərə malik olan və uğurlu inkişafımıza güclü sadiqlik nümayiş etdirən siyasətin göstəricisidir. Uğurlu inkişaf müxtəlif amillərə əsaslanır. Azərbaycanın müstəqilliyinin cəmi 35 ili var və müharibə, işğal, humanitar fəlakət, vətəndaş müharibəsi və digər çətinliklərlə müşayiət olunan ilk iki ili çıxmaq şərtilə, qalan dövr ölkənin sabit inkişafı ilə xarakterizə olunub ki, bu da hər bir ölkənin uğuru üçün əsas ilkin şərtlərdən biridir”.
