Artur Sakunts: “Erməni Konstitusiyası qüvvədən düşüb”
Ermənistan ərazisində erməni Konstitusiyası yox, rus Konstitusiyası fəaliyyətdədir.
ANS PRESS-in məlumatına görə, bu barədə erməni politoloq, Helsinki vətəndaş assambleyasının Vanadzor ofisinin başçısı Artur Sakuns bu gün keçirdiyi mətbuat konfransında rus əsgər Valeri Permyakovun Gümrüdə bir erməni ailənin 7 üzvünü qətl etməsi ilə bağlı Ermənistanda yaranmış vəziyyəti şərh edərkən bildirib.
O, Serj Sarkisyanın erməni xalqının maraqlarını müdafiə etmədiyini də vurğulayıb. “Serj Sarkisyan öz hakimiyyətini qorumaq üçün yalnız öz maraqlarını müdafiə edir. Dövlət başçısının son günlərdə susması bunun sübutudur”,- deyə politoloq vurğulayır.
Moskva Rusiyanın hazırkı Konstitusiyasına istinadən bildirir ki, Rusiya vətəndaşı mühakimə olunmaq üçün heç bir halda başqa bir ölkəyə təslim edilə bilməz.
Ermənilər Avetisyanlar ailəsinin qatili olduğu iddia edilən Valeri Permyakovun erməni məhkəməsinə verilməsini tələb edirdilər. Ermənistan İstintaq Komitəsi də Valeri Permyakova qarşı cinayət işi qaldırıb. Komitə onu Ermənistan Cinayət Məcəlləsinin 104-cü maddəsi ilə istintaqa cəlb etmək istəyir.
Rusiyanın 5-ci qarnizon məhkəməsi əsgərə qarşı Rusiya Federasiyasının Cinayət Məcəlləsinin iki maddəsi əsasında qətlə və fərariliyə görə cinayət işi qaldırılıb.
Valeri Permyakovun yanvarın 12-də Gümrü şəhərində Avetisyan ailəsinin 6 üzvünü qətlə yetirdiyi iddia edilir. Hadisıə zamanı yalnız 6 yaşlı Seryoja sağ qalmışdı. Bu günlərdə dünyasını dəyişmiş Seryoja Gümrüdə dəfn edilib. Valeri Permyakovun Ermənistan – Türkiyə sərhədində yerləşən Bayandur kəndində Rusiya sərhədçiləri tutulduğu bildirilib.
Hadisə Ermənistanda Rusiya hərbi bazasına qarşı ciddi etirazlara səbəb olub. Yüzlərlə insan İrəvandan Gümrüyə axın edərək hərbi bazanın və Rusiya konsulluğunun qarşısında etiraz mitinqi keçirir. Hazırda davam edən aksiyada etirazçılarla polis arasında qarşıdurma yaşanır. Aksiyada Rusiya bayrağı ayaqlar altına atılaraq tapdanıb.
