Baş Dövlət Yol Polisi İdarəsi hava şəraitinin dəyişməsi ilə əlaqədar hərəkət iştirakçılarına müraciət edib.
Elchi.az xəbər verir ki, müraciətdə deyilir:
“Milli Hidrometeorologiya Xidmətinin məlumatına əsasən, oktyabrın 10-da Bakıda və Abşeron yarımadasında, eyni zamanda ölkənin müxtəlif bölgələrində güclü külək əsəcəyi proqnozlaşdırılır. Belə hava şəraiti nəqliyyat vasitələrinin idarə olunmasını çətinləşdirə, küləyin təsiri ilə avtomobilin hərəkət trayektoriyasına nəzarəti zəiflədə və xüsusilə qoşqulu yük nəqliyyat vasitələrinin idarə olunmasında təhlükə yarada bilər”.
Baş Dövlət Yol Polisi İdarəsi hava şəraitinin dəyişməsi ilə əlaqədar bütün hərəkət iştirakçılarını diqqətli olmağa çağırıb. Sürücülərə hava və yol şəraitinə uyğun sürət rejimini seçmək, ara məsafəsini qorumaq, ötmə və manevr zamanı ehtiyatlı olmaq, həmçinin avtomobillərin şinlərinin təzyiqini və texniki vəziyyətini əvvəlcədən yoxlamaq tövsiyə olunub:
“Küləkli hava şəraitində açıq yollarda və körpülərdə hərəkət edən sürücülər, xüsusilə yük maşınları, avtobus və mikroavtobus idarə edənlər sükan arxasında daha diqqətli olmalı, ani istiqamət dəyişmələrindən çəkinməlidirlər.
Piyadalara küləkli və ya yağışlı hava şəraitində yolu keçərkən diqqətli olmaq, yalnız piyada keçidlərindən istifadə etmək, həmçinin görünmə şəraitinin məhdud olduğu hallarda geyimlərində işıq əks etdirən elementlərdən istifadə etmək tövsiyə edilir.
Velosiped, skuter və moped sürücülərinə isə belə hava şəraitində balansın itirilməsi və qəfil hadisələrin baş vermə ehtimalının artdığını nəzərə alaraq, ehtiyatlı davranmaq, mümkün qədər kəskin külək və yağış zamanı hərəkətdən çəkinmək məsləhət görülür”.
Baş Dövlət Yol Polisi İdarəsi bir daha xatırladıb ki, hava şəraitindən asılı olmayaraq, hər bir hərəkət iştirakçısının diqqətli və məsuliyyətli davranışı yol-nəqliyyat hadisələrinin qarşısının alınmasında mühüm əhəmiyyət daşıyır.
Həə, düz deyirlər, havaya diqqət eləmək lazım. Bu külək çox təhlükəlidi, maşın idarə eləmək çətin olur. Xüsusilə yük maşınları üçün. Yaxşı olar ki, hamı diqqətli olsun və qaydalara əməl etsin.
Düz deyir yol polisləri, bu havada maşın sürmək çox çətin olur. Külək elə vurur ki, maşın yerindən oynayır. Hər kəs diqqətli olsun, Allah qorusun hamını. Belə vaxtda sürəti azaltmaq lazımdı.
Əla məlumatdı, çox sağolun! Yol polisinə bu xəbərdarlığa görə təşəkkürlər. Həqiqətən də hava dəyişəndə yolda daha diqqətli olmaq lazımdı. Belə məlumatlar hamımız üçün faydalıdır.
Çox doğru bir məlumatdı, DYP-nin bu xəbərdarlığı çox vacib idi. Mənə elə gəlir ki, bu xəbərdarlıq bütün sürücülərə çatmalıdı. Hamı diqqətli olsun, heç kəsə qəza olmasın.