Ukraynanın Krım üzərində nəzarəti bərpa olunanadək ABŞ-ın Rusiyaya qarşı sanksiyaları qüvvədə qalacaq. APA-nın xəbərinə görə, bu barədə Dövlət Departamentinin nümayəndəsi Mark Tonerin bəyanatında deyilir.
Bəyanatda Rusiyanın 3 il əvvəl Krımı işğal etdiyi qeyd olunur. Dövlət Departamenti Krımda 2014-cü ilin martın 16-da keçirilən referendumun qeyr-legitim olduğunu qeyd edir: “Çünki Krım əhalisi ərazinin xarici ölkənin silahlı qüvvələri tərəfindən işğal olunduğu vaxt səs verməyə məcbur olub”. ABŞ bir daha Ukraynanın suverenliyini və ərazi bütövlüyünü tanıdığını qeyd edib.
“Krım tatarları, etnik ukraynalılar, Ukrayna yönümlü fəallar və müstəqil jurnalistlər daim siyasi təqiblərə və repressiyaya məruz qalırlar. Biz Rusiyanı fikir, ifadə, toplaşma azadlığını boğmaq cəhdlərinə son qoymağa çağırırıq. Krım Ukraynanın tərkib hissəsidir. ABŞ Krımın Rusiya tərəfindən işğal olunmasını bir daha pisləyir və Moskvanı buna dərhal son qoymağa çağırır. Rusiya Krım üzərində nəzarəti Ukraynaya qaytaranadək, ABŞ-ın Rusiyaya qarşı sanksiyaları qüvvədə qalacaq”, – deyə bəyanatda bildirilir.
Son şərhlər