ABŞ Dövlət katibi Mark Rubio Kubada mümkün böhranla bağlı iddiaları rədd edərək, ada ölkəsində pisləşən vəziyyətə görə iqtisadi blokada tətbiq edən ABŞ-ın heç bir məsuliyyət daşımadığını bildirib.
Elchi.az bu barədə “Reuters”-ə istinadən xəbər verir.
“Düşünürəm ki, hər kəsə bunun keçən həftə başlamadığını xatırlatmaq vacibdir. Artıq üç-dörd ildir ki, bəlkə də daha çox müddətdir ki, Kuba humanitar fəlakət yaşayır”, – deyə Rubio Kolumbiyada jurnalistlərə açıqlamasında bildirib.
Dövlət katibi adadakı humanitar böhrana görə bütün məsuliyyəti yerli hakimiyyət orqanlarının üzərinə qoyub.
Sentyabr ayında Kuba xarici işlər naziri Bruno Rodriqes Parrilya ABŞ-ın ticarət və maliyyə blokadası nəticəsində ölkəyə dəymiş rekord həcmdə ziyan barədə məlumat verdi. Onun sözlərinə görə, 1 mart 2025-ci il tarixindən 28 fevral 2026-cı il tarixinədək olan dövr ərzində bu rəqəm 8,083 milyard dollara çatıb ki, bu da əvvəlki rekord göstərici ilə müqayisədə 7%-lik artım deməkdir. Nazir əlavə edib ki, ABŞ-ın onilliklər boyu davam edən təzyiqləri nəticəsində Kubanın cari qiymətlərlə hesablanmış ümumi itkiləri 178,7 milyard dollar təşkil edib; qeyd olunan rəqəmə enerji embarqosu və ABŞ-ın tətbiq etdiyi ikinci dərəcəli sanksiyalar nəticəsində yaranan ziyanlar daxil edilməyib.
Avqust ayında ABŞ Kubaya qarşı sanksiyaları genişləndirərək, sanksiya siyahısına Kuba Xalqlarla Dostluq İnstitutunun (ICAP) üç rəsmisini və — Tikinti Nazirliyi də daxil olmaqla — doqquz təşkilatı əlavə etdi. Dağ-mədən, metallurgiya, xarici ticarət və digər sektorlardakı müəssisələr də məhdudiyyətlərə məruz qaldı.
Kuba xarici işlər naziri daha əvvəl bildirmişdi ki, ABŞ-ın yeni tədbirləri əhaliyə əsas xidmətlərin göstərilməsinə mane olur.
ABŞ 1960-cı illərin əvvəllərindən bəri Kubaya qarşı iqtisadi embarqonu davam etdirir. Son illərdə Vaşinqton sanksiyaları sərtləşdirib; Kuba rəsmiləri isə dəfələrlə bəyan ediblər ki, məhdudiyyətlərin gücləndirilməsi yanacaq çatışmazlığı, elektrik enerjisinin kəsilməsi və iqtisadi böhranın dərinləşməsinin əsas səbəbi olub. 2026-cı ilin yayında ölkə rəhbərliyi, gücləndirilmiş sanksiyalar şəraitinə uyğunlaşmaq zərurətini əsas gətirərək, genişmiqyaslı iqtisadi islahatlar elan etdi.
Yeganə
