Bu gün futbol üzrə 23-cü dünya çempionatına start verilir. İlk dəfə 48 komandanın iştirakı ilə 3 fərqli ölkə – ABŞ, Meksika və Kanadada keçirilən tarixin ən böyük mundialına maraq olduqca böyükdür.
Elchi.az Azərbaycan millisinin üzvləri və Premyer Liqada çıxış edən futbolçular arasında dünya çempionatı ilə bağlı sorğu keçirib.
Sorğu iştirakçılarına ünvanlanan 3 sual:
1. Dünya çempionatında dəstəklədiyiniz milli komanda hansıdır?
2. Sizin üçün turnirin əsas favoriti kimdir?
3. DÇ-2026-nın ən iddialı futbolçusu olaraq kimi görürsünüz?
Bədavi Hüseynov (“Qarabağ”ın kapitanı):
1. Dünya çempionatında Türkiyə və Özbəkistan millilərinə azarkeşlik edəcəm.
2. Turnirin əsas favoritləri kimi Fransa və İspaniyanı görürəm. Bu iki komanda inanılmaz futbol nümayiş etdirir.
3. Hazırda ən istedadlı oyunçu Lamin Yamaldır. Onun bu yaşda göstərdiyi oyun möhtəşəm səviyyədədir. Digər tərəfdən, karyeralarının son dünya çempionatını keçirən Luka Modriç, Kriştiano Ronaldu və Lionel Messi kimi yaşlı nəsli də diqqətlə izləyəcəm. Onların peşəkarlığı, futbola olan istək və sevgisi hər kəsə nümunədir.
Şahrudin Məhəmmədəliyev (“Qarabağ”ın qapıçısı):
1. Turnirdə Türkiyə və Özbəkistanı dəstəkləyəcəm.
2. Favorit qismində tək bir komandanın adını çəkə bilmərəm – İspaniya, Fransa və Portuqaliya arasında ciddi mübarizə gedəcək.
3. Ağlıma ilk gələnlər Lamin Yamal və Desire Due oldu, ümumilikdə diqqət mərkəzində olacaq gənclər çoxdur.
Coy-Lens Mikels (“Sabah”ın və Ruanda millisinin hücumçusu):
1. Fransa millisini dəstəkləyirəm.
2. Mənim üçün əsas favoritlər Fransa, İspaniya və Portuqaliyadır.
3. Maykl Olise və Lamin Yamalın parlayacağını gözləyirəm.
Elvin Bədəlov (“Neftçi”nin müdafiəçisi):
1. Turnirdə Portuqaliyaya azarkeşlik edəcəyəm.
2. Əsas favorit kimi İspaniyanı görürəm.
3. Çempionatın ən iddialı oyunçusu Lamin Yamal olacaq.
Faiq Hacıyev (“Turan Tovuz”un kapitanı):
1. Dəstəklədiyim komanda Türkiyədir.
2. Turnirin əsas favoriti Argentina millisidir.
3. Ən iddialı futbolçu kimi Maykl Oliseni görürəm.
İsmayıl İbrahimli (“Zirə”nin yarımmüdafiəçisi):
1. Dünya çempionatında İspaniya millisinə azarkeşlik edəcəm.
2. Favoritlərim Fransa və İspaniyadır.
3. Turnirin ən iddialı oyunçusu olaraq Lamin Yamalı deyərdim.
Slavik Alxasov (“Araz-Naxçıvan”ın müdafiəçisi):
1. Rəğbət bəslədiyim və dəstəklədiyim komanda qardaş Türkiyə millisidir.
2. Mənim üçün çempionluğa əsas namizəd Portuqaliyadır.
3. Turnirin ən iddialı və sürpriz edə biləcək oyunçuları isə Usman Dembele və ya Maykl Olisedir.
Rüstəm Əhmədzadə (“Sumqayıt”ın yarımmüdafiəçisi):
1. Mundialda Portuqaliya və İspaniyanı dəstəkləyəcəm.
2. Düşünürəm ki, turnirin əsas favoritləri Fransa və Portuqaliyadır.
3. Maykl Olise, Kilian Mbappe, Vitinya və Bruno Fernandesin çıxışını maraqla gözləyirəm.
Əli Səmədov (“Kəpəz”in yarımmüdafiəçisi):
1. Qəlbim Türkiyə millisiylədir.
2. Çempionluq üçün əsas favorit İspaniyadır.
3. İddialı futbolçular arasında ilk növbədə Lamin Yamalın adını çəkərdim.
Nicat Əliyev (“Qəbələ”nin müdafiəçisi):
1. Dəstəklədiyim komanda Türkiyədir, onları finalda görmək çox xoş olardı.
2. Mənim üçün turnirin əsas favoriti Fransadır.
3. İddialı oyunçular çoxdur, amma birini seçməli olsam, Fransa heyətindən Usman Dembeleni deyərdim.
Murad Musayev (“Şəfa”nın müdafiəçisi):
1. Əlbəttə ki, ilk növbədə Türkiyə millisini dəstəkləyirəm.
2. Turnirin kubokunu Portuqaliyanın qazanmasını çox istəyirəm.
3. Çempionatın ən iddialı və diqqət mərkəzində olacaq siması yenə Kriştiano Ronaldodur.
Edqar Ədilxanov (“Şamaxı”nın yarımmüdafiəçisi):
1. Turnirdə Fransa millisini dəstəkləyəcəm.
2. Çempionluq mübarizəsində əsas favorit kimi yenə Fransanı görürəm.
3. Turnirin ən iddialı və diqqətçəkən futbolçusu olaraq Rayan Çerkini fərqləndirirəm.
