Türkiyədə baş vermiş zəlzələ ilə bağlı səfərdə olan Azərbaycanın xarici işlər naziri Ceyhun Bayramov və türkiyəli həmkarı Mövlud Çavuşoğlu Fövqəladə Hallar Nazirliyinin (FHN) şəxsi heyətinin yerləşdiyi qardaş ölkənin Fövqəladə Halların İdarə Olunması Agentliyinin (AFAD) Kahramanmaraş şəhərindəki Kordinasiya Mərkəzində mətbuat konfransı keçirir.
Elchi.az-ın xəbərinə görə, hər iki nazir baş vermiş təbii fəlakətlərin fəsadlarının aradan qaldırılması istiqamətində aparılan axtarış-xilasetmə işlərindən danışır.
15:15
“Azərbaycandan Türkiyəyə könüllülər gələcəklər”.
Elchi.az-ın xəbərinə görə, bunu Azərbaycan xarici işlər naziri Ceyhun Bayramov Türkiyənin Fövqəladə Halların Nazirliyinin Kahramanmaraş şəhərində fəaliyyət göstərən mobil səhra hospitalında olarkən deyib.
“Azərbaycandan könüllülərin hissə-hissə, planlı şəkildə Türkiyəyə gəlməsi üzərində çalışmalar gedir. Bu gündən etibarən ölkəmizdən könüllülər Türkiyəyə gələcəklər”, – nazir bildirib.
14:52
Türkiyənin xarici işlər naziri Mövlud Çavuşoğlu Azərbaycan Fövqəladə Hallar Nazirliyinin həkimlərinə təşəkkür edib.
Elchi.az-ın xəbərinə görə, o, bu barədə FHN-in Kahramanmaraş şəhərində fəaliyyət göstərən mobil səhra hospitalında olarkən deyib.
“Sağ olun, qardaşlar. Allah qüvvət versin!” – Çavuşoğlu bildirib.
14:49
Türkiyədə baş vermiş zəlzələ ilə bağlı qardaş ölkədə səfərdə olan Azərbaycanın xarici işlər naziri Ceyhun Bayramov və türkiyəli həmkarı Mövlud Çavuşoğlu Azərbaycan Fövqəladə Hallar Nazirliyinin Kahramanmaraş şəhərindəki mobil səhra hospitalına gəliblər.
Elchi.az-ın xəbərinə görə, hər iki nazir hospitalda yaradılmış şəraitlə yaxından tanış olublar.
Daha sonra Bayramovla Çavuşoğluya mobil səhra hospitalında xəstələrə göstərilən yardımlar barədə məlumat verilib.
14:26
Türkiyənin xarici işlər naziri Mövlud Çavuşoğlu Azərbaycana təşəkkür edib.
Elchi.az-ın xəbərinə görə, o, bu barədə Kahramanmaraş şəhərində həmkarı Ceyhun Bayramovla dağıntılar altında qalmış şəxslərin çıxarılması əməliyyatlarını izləyərkən deyib.
“Qardaşlarımız Türkiyədə baş vermiş yanğınlar zamanı da bizə köməklik etdilər. Var olsun Azərbaycan!”
13:55
Türkiyədə baş vermiş zəlzələ ilə bağlı qardaş ölkədə səfərdə olan Azərbaycanın xarici işlər naziri Ceyhun Bayramov və türkiyəli həmkarı Mövlud Çavuşoğlu Kahramanmaraş şəhərindəki dağıntılar olan ərazilərə gəliblər.
Elchi.az-ın xəbərinə görə, hər iki nazir davam etdirilən axtarış-xilasetmə əməliyyatları ilə yaxından tanış olub.
Daha sonra C.Bayramovla M.Çavuşoğluya əməliyyatlarla bağlı məlumat verilib.
Kahramanmaraşda hər iki nazirin iştirakı ilə mətbuat konfransının keçiriləcəyi nəzərdə tutulub.
13:14
Azərbaycanın xarici işlər naziri Ceyhun Bayramov dağıdıcı zəlzələdən zərər çəkmiş Kahramanmaraş şəhərində Türkiyənin xarici işlər naziri Mövlud Çavuşoğlu tərəfindən qarşılanıb.
Ceyhun Bayramov Türkiyə Fövqəladə Halların İdarə Olunması Agentliyinin (AFAD) Mərkəzini ziyarət edib, zəlzələ bölgəsindən vətəndaşların xilas edilməsi, təxliyəsi, həmçinin zəlzələnin nəticələrinin aradan qaldırılması istiqamətində görülən işlərlə tanış olub.
12:33
Azərbaycanın xarici işlər naziri Ceyhun Bayramov Türkiyədə baş vermiş zəlzələ ilə bağlı qardaş ölkənin Kahramanmaraş şəhərinə gedib.
Elchi.az-ın xəbərinə görə, naziri gətirən təyyarə şəhərin hava limanına eniş edib.
Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Zəlzələ nəticəsində həlak olanların sayı 20 665 nəfərə çatıb, 80 088 nəfər yaralanıb. Güclü yeraltı təkanlardan sonra bölgədə 6,6 maqnitudayadək yüzlərlə afterşok qeydə alınıb. Təbii fəlakət Türkiyə və Suriyada böyük dağıntı və minlərlə itkiyə səbəb olub.
İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.
Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə yeddi günlük matəm elan edib. Bundan başqa, ölkənin zəlzələ baş verən 10 şəhərində üç aylıq fövqəladə vəziyyət elan olunub.
Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.
08:44
Azərbaycan Respublikasının xarici işlər naziri Ceyhun Bayramov Türkiyənin zəlzələdən zərər çəkmiş ərazilərini ziyarət etmək məqsədilə Kahramanmaraş şəhərinə səfərə yola düşüb.
Bu barədə Azərbaycan XİN-dən məlumat verilib.
Qeyd olunub ki, səfər çərçivəsində Ceyhun Bayramovun Türkiyənin xarici işlər naziri Mövlud Çavuşoğlu ilə görüşü nəzərdə tutulur. (report)
Son şərhlər