Çexiya Avropa İttifaqının İsrailə qarşı növbəti ticarət sanksiyalarını qəbul etməsinə icazə verməyəcək və ehtiyac yaranarsa, onları bloklayacaq.
Elchi.az xəbər verir ki, bu barədə Çexiyanın xarici işlər naziri Petr Masinka respublikada səfərdə olan İsrailin xarici işlər naziri Gideon Saar ilə danışıqların yekunlarına dair keçirilən mətbuat konfransında bəyan edib. Görüşün yayımını “ČTK” informasiya agentliyi həyata keçirib.
“Biz Aİ-nin İsrailə qarşı hər hansı növbəti ticarət sanksiyalarına icazə verməyəcəyik, hətta bunun üçün icmanın yeganə üzv dövləti olaraq sanksiyaların qəbulunu bloklamalı olsaq belə. Biz Aİ-nin İsrail ilə assosiasiya tərəfdaşlığı sazişindən imtina edilməsinə və ya onun dondurulmasına qətiyyən yol verməyəcəyik”, — deyə Masinka bildirib.
O, həmçinin vurğulayıb ki, Çexiya “heç bir İsrail siyasətçisinin sanksiyalara məruz qala bilməyəcəyi mövqeyində israr edib”.
“İsrailin düşməni çoxdur, dostu isə azdır. Mən Çexiyanın İsrailin dostları sırasında olduğunun tam aydın görünməsini istəyirəm”, — deyə Çexiya XİN rəhbəri əlavə edib. O, respublikanın İsraildəki səfirliyinin Tel-Əvivdən Qüdsə (Yerusəlimə) köçürülməsi prosesinin tezliklə başa çatdırılmasının tərəfdarı olduğunu bildirib. Qərarın Çexiya hökuməti tərəfindən qəbul edildiyini xatırladan Masinka, “Şəxsən mən bunu çox istərdim”, — deyə qeyd edib.
Məryəm
