Bosniya və Herseqovinanın Nazirlər Şurasının sədri xanım Borjana Krištoya cəmiyyətdə söz və mətbuat azadlığının inkişafı, həmçinin beynəlxalq media qrupları ilə əlaqələrin möhkəmləndirilməsinə töhfə vermək sahəsindəki xidmətlərinə görə “Azərbaycanım” beynəlxalq jurnalının təsis etdiyi “Jurnalistlərin Dostu” qızıl ordeni təqdim olunub.
Bosniya və Herseqovinanın Nazirlər Şurasının sədri xanım Borjana Krištoya mükafatı jurnalın baş redaktoru, Beynəlxalq Elmlər Akademiyasının akademiki Emil Nəsirli Bosniya və Herseqovinanın Mostar şəhərində Nazirlər Şurasının inzibati binasında görüş zamanı təqdim edib.
E.Nəsirli görüş zamanı bildirib ki, ölkəmizin çap mediasında özünəməxsus dəst-xəti ilə seçilən “Azərbaycanım” jurnalı 22 ildən çoxdur ki, maraqlı, məzmunlu yazıları ilə oxucularının görüşünə gəlir. Jurnalın kollektivi Azərbaycanın haqq səsinin dünya oxucusuna çatdırılması üçün layiqincə çalışıb, bu istiqamətdə böyük səylər göstərib. Bunun nəticəsidir ki, “Azərbaycanım” jurnalı aylıq nəşr kimi nəinki respublika ərazisində, eləcə də dünyanın müxtəlif ölkələrində geniş oxucu auditoriyası qazanıb.
Sonra ölkələrimiz arasında əlaqələrin bugünkü səviyyəsindən söhbət açan Emil Nəsirli ölkələrimiz arasında iqtisadi və siyasi sahələrdə əlaqələrin genişləndiyini vurğulayıb. Azərbaycan Respublikasının Prezidenti İlham Əliyevin Bosniya və Herseqovinaya rəsmi səfərini məmnunluqla xatırlayan baş redaktor Emil Nəsirli həmin səfər çərçivəsində ölkələrimiz arasında strateji tərəfdaşlıq haqqında birgə Bəyannamənin imzalandığını qeyd edib və Azərbaycanın bu sənədin tələblərindən irəli gələn bütün işləri gördüyünü, əməkdaşlığa öz töhfəsini verdiyini bildirib.
Bosniya və Herseqovinanın bizim üçün yaxın dost və tərəfdaş olduğunu, tarixi əlaqələrin mövcudluğunu vurğulayan baş redaktor Emil Nəsirli deyib ki, Azərbaycan ilə Bosniya və Herseqovina arasında həmrəylik, qarşılıqlı hörmət prinsipləri əsasında tərəfdaşlıq inkişaf edir.
E.Nəsirli beynəlxalq təşkilatlar çərçivəsində ölkələrimizin fəal əməkdaşlıq etdiyini deyərək, siyasi əlaqələrimizin də yaxşı səviyyədə olduğunu vurğulayıb. Hələ sovetlər dövründə Bakı ilə Sarayevonun qardaşlaşmış şəhərlər olduğunu qeyd edən baş redaktor, o zaman Sarayevodan çoxlu sayda nümayəndə heyətlərinin ölkəmizə gəldiyini, sərginin də təşkil edildiyini məmnunluqla xatırladıb. İqtisadi əməkdaşlığın genişləndirilməsi üçün yaxşı potensialın mövcudluğunu qeyd edən E.Nəsirli hər iki ölkənin rəsmilərinin qarşılıqlı səfərlərinin ikitərəfli hüquq-müqavilə bazasının möhkəmləndirilməsi işinə də töhfə verəcəyinə ümidvarlığını bildirib.
Görüşdə Bosniya və Herseqovinanın Nazirlər Şurasının sədri xanım Borjana Krišto bu mükafata layiq gördüklərinə görə jurnalın Redaksiya Şurasına təşəkkürlərini bildirib, iki ölkə arasında əlaqələrin və əməkdaşlığın gücləndirilməsi istiqamətində Azərbaycan tərəfinin gördüyü işləri yüksək qiymətləndirib.
Aparılan fikir mübadiləsi zamanı Bosniya və Herseqovinanın Nazirlər Şurasının sədri xanım Borjana Krišto bildirib ki, əlbəttə, Sizin qeyd etdiyiniz kimi ölkələrimiz dost ölkələrdir. Biz ikitərəfli əməkdaşlığımızı gücləndirmək üçün çalışmalıyıq, xüsusilə iqtisadiyyat və turizm sahələrində. “Ölkələrimiz arasında əlaqələrin müxtəlif istiqamətlərdə, o cümlədən enerji, nəqliyyat, infrastruktur, sərmayə qoyuluşu, turizm və digər sahələrdə genişləndirilməsi üçün böyük potensial var”, -deyə Borjana Krišto bildirib.
Görüşdə Azərbaycan ilə Bosniya və Herseqovina arasında dostluq və tərəfdaşlıq münasibətlərinin olduğu vurğulanıb, ölkələrimizin beynəlxalq təşkilatlar çərçivəsində uğurlu əməkdaşlığı və qarşılıqlı dəstəyi yüksək qiymətləndirilib.
Söhbət zamanı ölkələrimiz arasında mətbuat orqanları arasında informasiya mübadiləsi, həmçinin enerji sahəsində əməkdaşlıq, iqtisadi-ticari əlaqələrin genişləndirilməsi ilə bağlı fikir mübadiləsi aparılıb, yüksəksəviyyəli qarşılıqlı səfərlərin və təmasların bundan sonra da davam etdiriləcəyi bildirilib.
Sonda xatirə şəkli çəkdirilib.
