Birləşmiş Millətlər Təşkilatı (BMT) Nigeriyanın Niger əyalətindəki bir bazara dəstə üzvlərinin silahlı hücumunu pisləyib. İlkin məlumatlara görə, bu hücum nəticəsində 50 nəfər ölüb.
Elchi.az xəbər verir ki, yazılı açıqlamada BMT-nin Nigeriya üzrə Humanitar və Rezident Koordinatoru Məhəmməd Fall 3 yanvarda Niger əyalətinin Demo bölgəsindəki Kasuwan-Daji Bazarında mülki şəxslərə qarşı hücumda onlarla insanın ölümünə görə dərin kədərini bildirib.
Fall bu hücumların yaşamaq hüququ da daxil olmaqla fundamental insan hüquqlarının ciddi şəkildə pozulması olduğunu vurğulayıb və qadın və uşaqların hədəfə alınmasının qəbuledilməz olduğunu qeyd edib.
Məhəmməd Fall həmçinin hücumların təhsil hüququnu ciddi şəkildə pozduğunu bildirib.
Fall qeyd edib ki, BMT mülki şəxslərin müdafiəsini gücləndirmək və daha təhlükəsiz təhsil mühiti yaratmaq üçün Nigeriya hökuməti ilə əməkdaşlığını davam etdirməyə sadiqdir.
3 yanvarda Niger əyalətindəki bir bazara dəstə üzvlərinin hücumunda ilkin məlumatlara görə, 50 nəfər ölüb, çoxlu sayda insan qaçırılıb və bazardakı ərzaq məhsulları talan edilib.
Nigeriya uzun müddətdir ki, ölkənin müxtəlif yerlərində silahlı dəstələrin, eləcə də Boko Haram və İŞİD-in Qərbi Afrika qolu olan ISWAP kimi terror təşkilatlarının hücumları ilə üzləşir. Adam oğurluğu ölüm cəzası ilə cəzalandırılsa da, fidyə müqabilində adam oğurluğu halları tez-tez baş verir. Silahlı şəxslər ümumiyyətlə kəndləri, məktəbləri və səyahətçiləri hədəfə alaraq fidyə tələb edirlər. Müxbir: Adam Əbu-Bəşal
Şayəstə
