79 milyard dollarlıq sərvəti ilə dünyanın ən zəngin adamı olan amerikalı milyarder Bill Qeyts sərvətinə uyğun olaraq möhtəşəm bir malikanədə yaşayır. Qeytsin malikanəsi Vaşinqtom ştatının kiçik Medine şəhərindədir.
ABŞ dövlətinin təsisçi-atalarından biri və bu dövlətin ilk prezidenti olan Corc Vaşinqotunun adını daşıyan Vaşinqton ştatı ölkənin şimal qərbində, Sakit okeanın sahilində, Kanada ilə sərhəddə yerləşir və ölkənin ən ucqar ştatıdır.
Bill Qeyts böyük və təmtəraqlı malikanəsinə daxil olan tikililərə ümumilikdə 63 milyon dollar xərcləyib. Tikinti 7 il çəkib. Hazırda malikanənin qiyməti ən azı 123 milyon dollardır.
Bill Qeyts yaşayış kompleksinin “Zanada 2.0” adlandırıb.
Malikanənin yerləşdiyi ərazini milyarder 1988-ci ildə 2 milyon dollara alıb. Bu malikanə üçün Qeyts daşınmaz əmlak vergisi olaraq ildə 1 milyon dollar vergi verir.
Malikanənin tikintisinə 1,2 min kubmetr taxta materialı işlədilib. Binalar əsasən Oreqon çamından tikilib və yaşı 500-ü keçmiş ağaclar seçilib.
Tikintidə 100-ü elektrik işçiləri olmaqla 300 nəfər çalışıb. Bütün malikanəni sensor sistemi əhatə edir. Bu sensorlar burada yaşayanlara otaqlarda havanı və işıqlandırmanı idarə etmək imkanı verir. Qonaqlar malikanəyə daxil olanda onlara xüsusi breloklar verilir və onlar otaqlarda hansı hava və işıqlandırma tipini istəyirlərsə, onun göstəricilərini brelokun monitoruna daxil edirlər. Daha sonra onlar bir tikilidən başqasına keçəndə hava və işıq parametrləri onların sifarişinə uyğun avtomatik dəyişilir.
Hansısa otaqda bir musiqi parçasını dinləməyə başlayan şəxs yerini dəyişsə də, həmin musiqi divar kağızının altında yerləşdirilmiş dinamiklər sisteminin sayəsində başqa otaqlarda da onu “təqib edir”. İstilik itkisinin azaldılması üçün yerli şəraitin xüsusiyyətlərindən istifadə olunur.
Divardakı rəsm əsərləri bir düyməni basmaqla dəyişir. Evin hər tərəfində ümumi dəyəri 80 min dollar olan kompüter ekranları quraşdırlıb. İstənilən şəxs kompüterin ekranına öz sevimli rəsm əsərini və ya şəklini qoya bilir. Bu sistemin qiyməti 150 min dollardır.
Hovuzda sualtı musiqi sistemi quraşdırılıb. 18 metrlik hovuz 360 kvadratmetlik böyük, palıdı tikilinin önündə inşa edilib. Tikilidə dörd duşxanalı və iki vannalı geyinib-soyunma otağı, sauna, buxar otağı, 230 kvadratmetrlik trenajor zalı var.
Evin böyük qəbul salonunda bir dəfəyə 200 qonaq masa arxasında otura bilər.
Zalda iki metrlik buxarı mövcuddur. Ümumilikdə evdə 24 hamam otağı var, onlardan 10-u cakuzi ilə təchiz edilib.
Bill Qeytsin qonaq-qaralı adam olduğunu, tez-tez ziyafətlər, ballar təşkil etdiyini nəzərə alsaq, bu qədər hamam-tualetin nəyə lazım olduğu anlaşılar. Elə malikanədə fəaliyyət göstərən 6 mətbəx də milyarderin qonaqlarını delikateslərlə, cürbəcür ləziz təamlarla doyurmaq üçündür.
Evdə nəhəng kitabxana var və burada nadir kitablarla yanaşı, Qeytsin 30 milyon dollar xərclədiyi əlyazmalar da qorunub saxlanılır. Kitabxananın üzərində 200 kvadratmetrlik kümbəz quraşdırılıb. Kümbəzdə iki gizli şkaf var, onlardan biri içki barı rolunu oynayır. Tavanda amerikalı yazıçı Frensis Skott Fitsceraldın “Möhtəşəm Getsbi” romanından bir sitat həkk edilib. Həmin sitat belədir: “Onu bu məxməri çəmənliyə gətirən yol uzun olmuşdu və indi, arzusuna yaxın olduğu bir vaxtda ona elə gəlirdi ki, əlini uzatmağı bəsdir ki, arzusuna çatsın”.
Burada Leonardo da Vinçinin 16-cı əsrə aid əlyazması, Lester məcəlləsi də saxlanılır. Qeyts bu əlyazmanı 1994-cü ildə hərracda 30,8 milyon dollara alıb.
Evdəki məxmər oturacaqlı kinoteatr 20 nəfər üçün nəzərdə tutulub. Kinoteatr ardeko stilində quraşdırılıb, burada rahat kreslo və divan, hətta popkorn avtomatı da var.
Malikanənin ərazisində ayrıca bir bina və onun yaxınlığında tennis kortu, qolf oynamaq üçün məşq meydançası və qayıq körpüsü var. Burada da qonaq otaqları, hamamxanalar mövcuddur. Bu binada da elektronik cihazlar baş binada olduğundan az deyil. Qeyts “Gələcəyə yol” kitabının böyük hissəsini məhz bu binada yazıb.
Ümumilikdə malikanənin qarajlarında 23 avtomobil var. Onlar ərazinin müxtəlif yerlərində tikilmiş qarajlarda saxlanılır. Onlardan ən maraqlısı polad və betondan mağara üslubunda tikilib. Bu qarajda 10 avtomobil dayanır.
Milyarderin malikanədə sevimli ağacı var, bu, 40 yaşlı qayın ağacıdır. Ağaca xüsusi kompüter qulluq edir, torpağın nəmliyini nəzarətdə saxlayır, əgər torpaq çox qurudursa, avtomatik olaraq sulama sistemi işə düşür.
Malikanədə inşa edilmiş süni çayda balıqlar, əsasən qızıl balıq (forel) və losos yetişdirilir.
Qeytsin malikanəsindəki çimərliyin qumu Karib dənizindən gətirilib. Hər il Sent-Luisdən gələn gəmi gölün çimərliyinə qum gətirir. Bu reyslərin hər biri milyarderə 35 min dollara başa gəlir.
Son şərhlər