Uzun müddət yüksək duz tərkibli qidaların qəbulu yaddaş və öyrənmə qabiliyyətini zəiflədə, eyni zamanda narahatlıq davranışını artıra bilər.
Elchi.az xəbər verir ki, bu nəticəyə “Sian Jiaotong” Universitetinin alimləri gəliblər.
Tədqiqatın nəticələri European Journal of Pharmacology (EJP) jurnalında dərc olunub.
Eksperiment zamanı laboratoriya siçanları altı ay boyunca yüksək duzlu diyeta ilə qidalandırılıb. Davranış testləri onların kognitiv funksiyalarının zəiflədiyini, öyrənmə qabiliyyətinin aşağı düşdüyünü və narahatlıq səviyyəsinin artdığını göstərib. Eyni zamanda tədqiqatçılar hipokampda — yaddaş və emosiyaların formalaşmasında əsas rol oynayan beyin bölgəsində neyron zədələnmələri və iltihab əlamətləri aşkar ediblər.
Analiz göstərib ki, bu dəyişikliklərin əsas mexanizmi “bağırsaq–beyin” oxunun pozulmasıdır. Yüksək duzlu diyeta bağırsaq mikrobiotasının tərkibində dəyişikliklərə səbəb olub, bu isə öz növbəsində beyin genlərinin fəaliyyətinin dəyişməsi, neyroiltihabın artması və sinir hüceyrələrinin ölümü ilə əlaqəli olub.
Alimlər iltihabi və neyrodegenerativ proseslərlə əlaqəli konkret bakteriya qruplarını da müəyyən ediblər. Xüsusilə, bağırsaq mikrobiotasında Dubosiella və Anaeroplasma qruplarının artması bir neçə iltihab markerinin (Btbd16, Il1b, Prlr, Cd24a, Ak) ifadəsinin yüksəlməsinə səbəb olub.
Tədqiqat müəllifləri qeyd edirlər ki, əldə olunan nəticələr bağırsaq mikrobiotasının kognitiv pozğunluqların inkişafındakı rolunu təsdiqləyir və dietdə duzun həddindən artıq istifadəsinin potensial təhlükəsinə işarə edir. Gələcəkdə bu nəticələr qidalanmanın tənzimlənməsi yolu ilə kognitiv sağlamlığın qorunması üçün profilaktik yanaşmalara əsas yarada bilər.
Məryəm
