Bank sahəsi üzrə aparılan son araşdırmalara görə bankların faiz dərəcələri 9.5%-26% aralığında müəyyən edilib. Vətəndaşlar faiz dərəcələrin yüksək olma səbəbini banklarda, kredit verənlər isə ölkə iqtisadiyyatının durumunda görür. Mütəxəsislər qeyd edir ki, kredit faizlərin artmasına bir çox amillər təsir edir.
Bank məsələləri üzrə mütəxəssis Əkrəm Həsənov Elchi.az – a açıqlamasında bildirir ki, Azərbaycanda əmanət üzrə faizlər tez-tez dəyişilir: “Qeyd edim ki dünyanın əksər ölkələrində bu 1 və yaxud 2 faizdir. Təbii ki, banka belə yüksək faizlə pul qoyulduqda bank da həmin pulunun üstünə faiz qoyub digər vətəndaşa verir.
Ə. Həsənov onu da bildirir ki, bankların təyin etdiyi faiz rəqəmləri ölkəmizdəki sosial vəziyyətə uyğun deyil: “Ölkəmizdə həm faiz dərəcələrində, həm də əmanətlərin qoyulmasında problem var. Faizlərin aşağı olmasını istəyiriksə, əmanət üzrə olan gəlirin faiz dərəcəsini də endirməliyik. Bu da ondan xəbər verir ki, ölkəmizdə ümumiyyətlə kredit riski yüksəkdir.
Bəzi hallarda banklarda əlavə borcların yazılması halları ilə də rastlaşırıq. Bu, 2 halda ola bilər. Qanunsuz borcların yaranmaması üçün vətəndaş bağladığı müqavilə üzrə qrafikə tam riayət etməlidir. Lakin heç bir qaydanı pozmadan qanunsuz borc yazılıbsa, bu zaman vətəndaş qanuni məhkəməyə müraciət etməlidir”.
Havar Şəfiyeva