Şadlıq evinin qarşısında Mübariz Məsimoğlunu bıçaqlayan şəxsin özü də şair imiş
Bakıda iki nəfəri bıçaqlayan şəxs saxlanılıb. Paytaxtın Nizami Rayon Polis İdarəsindən APA-ya verilən məlumata görə, həyata keçirilən əməliyyat axtarış tədbirləri nəticəsində 1962-cı il təvəllüdlü şair Mübariz Məsim oğlu Nəsibovu və onun dostu, 1960-cı il təvəllüdlü Cavanşır Əkbər oğlu Kazımovu bıçaqlayan 1954-cü il təvəllüdlü Hürriyət Məmməd Oğlu Məmmədov yaxalanıb.
Qeyd edək ki, H. Məmmədov Azərbaycan Yazıçılar Birliyinin (AYB) üzvüdür.
Xatırladaq ki, hadisə metronun “Qara Qarayev” stansiyası yaxınlığında qeydə alınıb.
*****
11:28
Dünən axşam şadlıq evinin qarşısında bıçaqlanan şair Mübariz Məsimoğlu baş verən hadisə ilə bağlı “Kulis”ə danışıb.
Qarın boşluğu, bud və əl nahiyəsindən yaralar alan M.Məsimoğlu bildirib ki, onu vuran şəxs şair həmkarı, AYB üzvü Hürriyyət Məmmədzadədir: “Konkret heç bir səbəb yoxdur. Sadəcə, onu bəzi yaramaz hərəkətlərinə görə öz stoluma buraxmırdım. Bu da öz aləmində qisas almaq istəyib. Törətdiyi əməli əvvəldən planlaşdırıb. Qəfil məni vurdu, müqavimət göstərib bıçağı əlindən aldım və buraxdım, ikinci dəfə ikinci bıçaqla hücum etdi. Amma bu yaralar elə də dərin deyil. Birinci vurduğu bıçaq qarın boşluğuma işləyib, ancaq heç bir orqana zərər dəyməyib. İndi palatadayam, özümü yaxşı hiss edirəm.”
Hadisəni törədən H.Məmmədzadə hadisə yerindən qaça bilib və hazırda harda olduğu bilinmir.
*****
10:34
Dünən axşam bıçaqlanan şair Mübariz Məsimoğlunun vəziyyəti stabildir. 3 saylı Şəhər Klinik Xəstəxanasından Kulis-ə verilən məlumata görə şair əməliyyat olunub.
Qarının ön divarında, sol budunda və sol əlin ikinci barmağında deşilmiş yaralar üzərində cərrahiyə əməliyyatı aparılıb. Şair artıq palataya köçürülüb, müalicəsi davam etdirilir.
*****
01:28
Şair Mübariz Məsimoğlu ilə birlikdə bıçaqlanan şəxsin adı məlum olub. 3 saylı Şəhər Klinik Xəstəxanasından APA-ya verilən məlumata görə, bu, 55 yaşlı Cavanşir Əkbər oğlu Kazımovdur.
Faktla bağlı hələlik saxlanılan yoxdur. Nizami Rayon Polis İdarəsindən APA-ya bildiriblər ki, cinayəti törədən şəxs və ya şəxslərin saxlanılması istiqamətində əməliyyat-axtarış tədbirləri davam etdirilir.
**** 00.18
Bakının Nizami rayonunda bıçaqlanma hadisəsi baş verib.
APA-nın məlumatına görə, hadisə metronun “Qara Qarayev” stansiyası yaxınlığında qeydə alınıb. 53 yaşlı Mübariz Məsimoğlu və yaxın qohumu şadlıq evlərindən birinin qarşısında bıçaqlanıb.
Yaralılar 3 saylı Şəhər Klinik Xəstəxanasına çatdırılıblar. Xəstəxanadan verilən məlumata görə, beş bıçaq yarası alan Mübariz Məsimoğlu əməliyyat olunub və reanimasiya şöbəsinə yerləşdirilib. Onun vəziyyətinin ağır olduğu bildirilir. Şəxsiyyəti hələlik dəqiqləşdirilməyən digər yaralı isə bir bıçaq yarası ilə xəstəxanaya daxil olub.
Qeyd edək ki, Mübariz Məsimoğlu şairdir.
