Elm və Təhsil Nazirliyinin Kimya İnstitutunun və Neft-Kimya Prosesləri İnstitutunun əməkdaşlarının həmmüəllifi olduqları icmal məqaləsi beynəlxalq elmi jurnalda dərc olunub.
Kimya İnstitutundan Elchi.az-a bildirilib ki, “Tullantı suların təmizlənməsi üçün polimer sorbentlər: quruluş-performans əlaqələri və adsorbsiya mexanizmləri” adlı məqalə “Web of Science” və “Scopus” beynəlxalq elmi bazalarında indekslənən “Environmental Quality Management” jurnalında yayımlanıb. Jurnalın impakt faktoru 2,3, kvartili isə Q3-dür.
Məqalənin müəllifləri Kimya İnstitutunun Nanostrukturlaşdırılmış metal-polimer katalizatorları laboratoriyasının əməkdaşları Çiçək Seyidova, Həcər Aslanova, Nigar Şıxverdiyeva, Nərgiz Rəhimli, Cəmilə Quliyeva, Aytac Cavadzadə, Ülviyyə Məmmədova və Nizami Zeynalov, eləcə də Neft-Kimya Prosesləri İnstitutunun əməkdaşı Pərvanə Mövsümovadır. İcmal məqaləsində tullantı suların təmizlənməsində istifadə olunan polimerəsaslı sorbentlər, onların quruluşu ilə adsorbsiya effektivliyi arasındakı əlaqələr və müxtəlif çirkləndiricilərin sudan ayrılması mexanizmləri təhlil edilib. Məqalədə ağır metalların, sintetik boyaların, per- və poliflüoralkil maddələrin (PFAS), əczaçılıq qalıqlarının və endokrin sistemə təsir edən birləşmələrin təmizlənməsində polimer sorbentlərin tətbiq imkanları nəzərdən keçirilib. Polimerlərin funksional qruplarının modifikasiyasının, tikilmə sıxlığının və məsaməli quruluşunun adsorbsiya prosesinə təsiri qiymətləndirilib.
Həmçinin molekulyar imprintinq polimerləri, polimer ion mayeləri, stimullara həssas hidrogellər və maqnit polimer nanokompozitləri kimi perspektivli materiallar haqqında elmi məlumatlar ümumiləşdirilib. Sorbentlərin regenerasiyası, təkrar istifadəsi, struktur sabitliyi və praktiki tətbiqi ilə bağlı mövcud çətinliklər təhlil olunub. Gələcək tədqiqatlarda polimer sorbentlərin layihələndirilməsində maşın öyrənməsi yanaşmalarının tətbiq perspektivlərinə də diqqət yetirilib.
Məqalə polimerəsaslı sorbentlərin inkişafı, tullantı suların təmizlənməsi texnologiyalarının təkmilləşdirilməsi və ekoloji problemlərin həlli istiqamətində aparılan elmi araşdırmalar üçün əhəmiyyətli mənbədir.
