Kreml Azərbaycan Prezidenti İlham Əliyevin Rusiyaya rəsmi səfəri barədə məlumat yayıb.
APA xəbər verir ki, Kremlin saytında yerləşdirilən məlumata görə, fevralın 22-də Rusiya Prezidenti Vladimir Putin və Azərbaycan Prezidenti İlham Əliyev arasında danışıqlar olacaq.
Danışıqlarda siyasi, iqtisadi-ticari və humanitar sahələrdə ikitərəfli münasibətlərin sonrakı inkişafı üçün bütün kompleks məsələlərin müzakirəsi nəzərdə tutulur.
Bundan başqa, görüşdə Rusiya, Azərbaycan və Ermənistan liderlərinin Qarabağ üzrə 9 noyabr (10 noyabr) 2020-ci il, 11 yanvar və 26 noyabr 2021-ci il tarixli razılaşmalarının reallaşmasının gedişi, o cümlədən Cənubi Qafqazda iqtisadi və nəqliyyat əlaqələrinin bərpası tədbirləri müzakirə olunacaq.
Danışıqların yekunu olaraq, “Azərbaycan Respublikası ilə Rusiya Federasiyası arasında qarşılıqlı müttəfiqlik fəaliyyəti haqqında” Bəyannamənin imzalanması nəzərdə tutulur.
APA-nın əldə etdiyi məlumata görə, Prezident İlham Əliyevin Rusiyaya səfəri yenilik deyil, uzun müddətdir hazırlanır.
2021-ci ilin iyununda Azərbaycanla Türkiyə arasında imzalanan Şuşa bəyannaməsinə oxşar sənədin Azərbaycanla Rusiya arasında da imzalanmasına hazırlıq gedirdi. Bununla bağlı işə 2021-ci ilin əvvəlindən başlanılıb. Sənədin hazırlanması və razılaşdırması uzunmüddətli iş tələb edir.
Prezident İlham Əliyev 2021-ci ilin sonunda Yeni illə bağlı xalqa müraciətində də Rusiya-Azərbaycan əlaqələrinin keyfiyyətcə yeni səviyyəyə qalxacağını anons etmişdi.
Odur ki, “Azərbaycan Respublikası ilə Rusiya Federasiyası arasında qarşılıqlı müttəfiqlik fəaliyyəti haqqında” Bəyannamənin imzalanması yeni gündəmə çıxan məsələ deyil.
Ekspertlər isə bu sənədin Ermənistana böyük zərbə olduğunu bildirirlər.
Son şərhlər