Bu gün Azərbaycan xarici işlər naziri Ceyhun Bayramov Ukraynaya rəsmi səfəri çərçivəsində ukraynalı həmkarı Andrey Sibiqa ilə görüşüb.
Elchi.az xəbər verir ki, bu barədə Azərbaycan Xarici İşlər Nazirliyi (XİN) məlumat yayıb.
Bildirilib ki, tərəflər arasında təkbətək görüşdən sonra müzakirələr geniş tərkibli nümayəndə heyətlərinin iştirakı ilə davam edib.
Görüşlər zamanı Azərbaycan-Ukrayna strateji tərəfdaşlıq münasibətlərinin gündəliyində duran məsələlər, siyasi dialoq, ticarət-iqtisadi əməkdaşlıq, enerji, humanitar əlaqələr, eləcə də regional və beynəlxalq təhlükəsizlik məsələləri müzakirə olunub.
Xarici İşlər Nazirlikləri arasında siyasi məsləhətləşmələr, İqtisadi Əməkdaşlıq üzrə Hökumətlərarası Birgə Komissiya və Biznes Şurası kimi mexanizmlərin tərəfdaşlığımızın genişləndirilməsində mühüm rolu qeyd edilib.
Ticarət dövriyyəsində müşahidə olunan bərpa meylləri müsbət qiymətləndirilib, iqtisadi əməkdaşlığın daha da inkişaf etdirilməsi istiqamətində fikir mübadiləsi aparılıb.
Regional məsələlər ətrafında müzakirələr kontekstində Azərbaycanın Ukraynada hərbi əməliyyatların dayandırılması, münaqişənin beynəlxalq hüquq əsasında diplomatik yollarla həll edilməsinə tərəfdar olduğu bildirilib, ölkəmizin Ukraynanın beynəlxalq səviyyədə tanınmış sərhədləri çərçivəsində suverenliyi və ərazi bütövlüyünə ardıcıl dəstəyi bir daha təsdiq olunub.
Ukrayna xarici işlər naziri hərbi əməliyyatlar zamanı Qara dəniz və Azov dənizində Azərbaycan vətəndaşlarının həlak olması və yaralanması ilə əlaqədar başsağlığı və dərin hüzn ifadələrini çatdırıb, həlak olanların ailələrinə və yaxınlarına başsağlığı verib, yaralananlara isə tezliklə şəfa diləyib.
Azərbaycanın Ukraynaya göstərdiyi humanitar yardım, o cümlədən hərbi eskalasiyanın başlanmasından etibarən 50 milyon ABŞ dollarını aşan dəstək, İrpin şəhərində həyata keçirilən bərpa layihələri, ukraynalı uşaqlar üçün reabilitasiya proqramları, eləcə də mina təmizləmə sahəsində göstərilən yardım barədə danışılıb.
Görüşlər zamanı qarşılıqlı maraq doğuran digər istiqamətlər üzrə ətraflı fikir mübadiləsi aparılıb.
Görüşlərin yekununda mətbuat konfransı keçirilib, nazirlər bəyanatlarla çıxış edib və media nümayəndələrinin suallarını cavablandırıblar.
***
15:35
Azərbaycan xarici işlər naziri Ceyhun Bayramov ilə ukraynalı həmkarı Andrey Sibiqa arasında təkbətək görüş başa çatıb.
Elchi.az xəbər verir ki, bu barədə Azərbaycan Xarici İşlər Nazirliyi (XİN) sosial media hesabında paylaşım edib.
Bildirilib ki, tərəflər arasında geniş tərkibdə görüşü keçirilib.
Nazirlər Prezident Volodimir Zelenskinin Azərbaycana səfərindən sonra Azərbaycan və Ukrayna prezidentləri arasında əldə olunmuş razılaşmaların icrası istiqamətində görülən işləri nəzərdən keçiriblər.
Görüş zamanı Azərbaycan–Ukrayna strateji tərəfdaşlığı, ticarət, energetika, investisiyalar, nəqliyyat, humanitar və çoxtərəfli əməkdaşlıq, eləcə də regional və beynəlxalq təhlükəsizlik məsələləri müzakirə olunub.
Tərəflər yüksək səviyyəli təmasların müntəzəm davam etdirilməsinin, həmçinin siyasi məsləhətləşmələr, İqtisadi Əməkdaşlıq üzrə Hökumətlərarası Birgə Komissiya və Biznes Şurası kimi ikitərəfli mexanizmlərin əməkdaşlığın daha da genişləndirilməsində mühüm rol oynadığını vurğulayıblar.
Nazirlər Ukraynada davam edən müharibə fonunda regiondakı son inkişaflar və beynəlxalq gündəmdəki aktual çağırışlar ətrafında fikir mübadiləsi aparıblar.
Ceyhun Bayramov hərbi əməliyyatların ən qısa zamanda dayandırılmasının və beynəlxalq hüququn norma və prinsiplərinə ciddi riayət olunmaqla münaqişənin diplomatik yollarla həllinin vacibliyini bir daha diqqətə çatdırıb. Azərbaycanın Ukraynanın beynəlxalq səviyyədə tanınmış sərhədləri çərçivəsində suverenliyi və ərazi bütövlüyünə ardıcıl dəstəyi bir daha vurğulanıb.
Ukraynanın xarici işlər naziri Qara dəniz və Azov dənizində davam edən hərbi əməliyyatlar nəticəsində Azərbaycan vətəndaşlarının həlak olması və yaralanması ilə bağlı dərin hüznlə başsağlığı verib, yaralananlara isə tezliklə şəfa diləyib.
Nazirlər, həmçinin Azərbaycanın Ukraynaya 50 milyon ABŞ dollarını aşan humanitar yardımı, İrpen şəhərində həyata keçirilən bərpa layihələri və ukraynalı uşaqlar üçün reabilitasiya proqramlarını yüksək qiymətləndiriblər.
C.Bayramov görüş zamanı Cənubi Qafqaz regionundakı mövcud vəziyyət, eləcə də işğaldan azad edilmiş ərazilərdə aparılan bərpa və yenidənqurma işləri barədə ukraynalı həmkarına ətraflı məlumat verib.
***
11:16
Azərbaycan xarici işlər naziri Ceyhun Bayramov ilə ukraynalı həmkarı Andrey Sibiqa arasında təkbətək görüş başlayıb.
Elchi.az xəbər verir ki, bu barədə Azərbaycan Xarici İşlər Nazirliyi (XİN) sosial media hesabında paylaşım edib.
***
10:56
Azərbaycan xarici işlər naziri Ceyhun Bayramov Ukraynada bu ölkənin istehsalı olan dronların sərgisi ilə tanış olub.
Elchi.az xəbər verir ki, bu barədə Azərbaycan Xarici İşlər Nazirliyi (XİN) sosial media hesabında paylaşım edib.
Bildirilib ki, Ukrayna xarici işlər naziri Andrey Sibiqa azərbaycanlı həmkarı Ceyhun Bayramovu nazirlikdə qarşılayıb.
Qarşılanma mərasimindən sonra nazirlər birlikdə Ukraynada istehsal edilən pilotsuz uçuş aparatlarının nümayiş olunduğu sərgi ilə tanış olublar.
***
09:29
Azərbaycan xarici işlər naziri Ceyhun Bayramovu Kiyevdə ukraynalı həmkarı Andrey Sibiqa qarşılayıb.
Elchi.az xəbər verir ki, bu barədə Azərbaycan Xarici İşlər Nazirliyi (XİN) sosial media hesabında paylaşım edib.
***
08:12
Azərbaycan xarici işlər naziri Ceyhun Bayramov avqustun 6-da Ukraynaya rəsmi səfərə yola düşüb.
Elchi.az xəbər verir ki, bu barədə Xarici İşlər Nazirliyi məlumat yayıb.
Bildirilib ki, səfər çərçivəsində Ceyhun Bayramovun Ukraynanın xarici işlər naziri Andrey Sibiqa və digər yüksəkvəzifəli rəsmilərlə ikitərəfli görüşlər keçirməsi nəzərdə tutulur.
