Britaniyalı deputat Ermənistanı təmin edən məruzə hazırlayıb 
Ermənistanın “Tert.am” saytı yazır ki, Avropa Şurası Parlament Assambleyası (AŞPA) Azərbaycana etirazını bildirib. Etiraz isə Ramil Səfərovla bağlıdır. Belə ki, erməni tərəfi iddia edir ki, Macarıstanda həbsdə olmuş Ramil Səforovun Azərbaycana çatan kimi prezident tərəfindən əfv edilməsi AŞPA-nın qüvvədə olan konvensiyalarından birinin pozulmasına səbəb olub.
Erməni mediası xatırladır ki, rəsmi Budapeşt 2012-ci ilin 31 avqustunda Ramil Səfərovu Azərbaycana qaytarıb. O, 2007-ci ildə Budapeştə erməni zabiti Qurqen Markaryanı qətlə yetirməkdə ittiham olunmuşdu. Məhkəmə ona 30 il iş kəsmişdi və onun əfv olunması məhkəmənin hökmü ilə istisna edilmişdi.
Biz də sözügedən qətnamə ilə yaxından tanış olmaq üçün AŞPA-nın saytına nəzər saldıq. Saytda yerləşdirilmiş mətndən bəlli oldu ki, AŞPA-nın Daimi Komissiyasının Brüsseldə qəbul etdiyi qətnamə Böyük Britaniyanın təmsilçisi Kristofer Çopun məruzəsinə əsasən çıxarılıb. Məruzəni isə AŞPA-nın 60 üzvü dinləyib. Qeyd olunur ki, Vyana konvensiyasi kimi tanınan sənədin 12-ci maddəsində öz əksini tapmış “Mühakimə olunmuş şəxslərin qaytarılması ilə bağlı konvensiya” kobud şəkildə pozulub.
AŞPA-nın saytında yazılıb ki, cənab Səfərov Azərbaycanda milli qəhrəman kimi qarşılanıb. AŞPA-nın Daimi Komissiyası qeyd edir ki, məhbusların humanitar məqsədlə onların vətəninə göndərilməsi heç də o demək deyil ki, onlar dərhal əfv oluna bilərlər.
Göründüyü kimi, üstündən xeyli vaxt keçsə də ermənilər Ramil Səfərovu hələ də unutmayıblar və hər düşən fürsətdə onun adını yenidən gündəmə gətirməyə çalışırlar.
Elbəyi Həsənli
Son şərhlər