Birləşmiş Millətlər Təşkilatının (BMT) Beynəlxalq Miqrasiya Təşkilatı (BMQT) bu il Mərkəzi Aralıq dənizində 1000-dən çox qanunsuz miqrant və qaçqının həyatını itirdiyini bildirib.
Elchi.az xəbər verir ki, BMQT yazılı açıqlamasında Liviya sahillərində baş verən başqa bir faciəli hadisədə onların həyatını itirməsinə kədərləndiyini bildirib.
Bəyanatda qeyd olunub ki, Liviya hakimiyyəti 8 noyabrda əl-Buri neft yatağı yaxınlığında rezin qayığın aşmasından sonra axtarış-xilasetmə əməliyyatı keçirib. “Sağ qalanların sözlərinə görə, 49 miqrant və qaçqını (47 kişi və 2 qadın) daşıyan gəmi 3 noyabr saat 3:00 radələrində Zuvaradan yola düşüb. Təxminən altı saat sonra yüksək dalğalar mühərrikin sıradan çıxmasına, qayığın aşmasına və bütün sərnişinlərin dənizə düşməsinə səbəb olub”, – deyə açıqlamada bildirilir.
Bəyanatda qeyd olunur ki, təxminən altı gün dənizdə üzən qayıqdan yalnız yeddi nəfər xilas edilib və 42 nəfər hələ də itkin düşüb və ya ölü hesab olunur. Bəyanatda vurğulanıb ki, Surman və Lampedusa sahillərində baş verən digər ölümcül hadisələrdən bir neçə həftə sonra baş verən bu faciəli hadisə Mərkəzi Aralıq dənizi marşrutu boyunca qeyri-qanuni miqrantların və qaçqınların üzləşdiyi davamlı təhlükələri vurğulayır. Bəyanatda deyilir: “Mərkəzi Aralıq dənizində ölənlərin sayı bu il artıq 1000-i keçib. Bu son gəmi qəzası ilə ümumi say daha da artıb.” Bəyanatda həmçinin qeyd olunur ki, bu vəziyyət regional əməkdaşlığın gücləndirilməsi, təhlükəsiz və nizamlı miqrasiya yollarının genişləndirilməsi və daha çox insan itkisinin qarşısını almaq üçün daha effektiv axtarış-xilasetmə əməliyyatlarının aparılması üçün təcili ehtiyacı vurğulayır.
Şayəstə
