Ankara terrorundakı “Rusiya ləpiri” aydın görünməyə başlayır…

Türkiyənin baş naziri Əhməd Davudoğlu terrorla bağlı heç kimin göz yaşına rəhm edilməyəcəyini, günahkarların ciddi cəzalandırılacağını bəyan edib: “Ankarada 28 vətəndaşımızı itirdiyimiz terror aksiyası bütün Türkiyəyə, qardaşlığımıza yönəlib. Terroru həyata keçirən YPG bölücü terror təşkilatının bir qoludur, birlikdə hərəkət edirlər. Türkiyə bütövdür, 78 milyon bu çətinliyi də dəf edəcək gücə və qüdrətə sahibdir. Biz burdayıq, bu torpaqlardayıq, əbədi olaraq da burada qalacağıq”.

Qardaş ölkə Ankara faciəsinin fəsadlarını aradan qaldırmamış, yeni təhlükələrlə üz-üzə qalıb. Belə ki, Diyarbəkirin Dəclə rayonunda polisin keçirdiyi əməliyyat zamanı içərisində 500 kq partlayıcı maddə olan bir avtomobil saxlanılıb. Eyni zamanda, Diyarbəkir vilayətində hərbiçilərin olduğu köhnə bina çöküb. Binada olan 9 nəfər xilas olsa da, 3 nəfərin axtarışları davam edir. Hadisənin hansı səbəbdən baş verdiyi məlum deyil.

Bu arada Türkiyə ordusu Diyarbəkir vilayətinin Sur qəsəbəsində antiterror əməliyyatı zamanı itki verib.

Musavat.com xəbər verir ki, qısıbıdı terrorçuların qazdığı xəndəklərin bağlanması, qurulan barrikadaların ləğv edilməsi və gizlədilən partlayıcıların zərərsizləşdirilməsi istiqamətində əməliyyatlar davam edir. Əməliyyat zamanı PKK terrorçuların hücumu nəticəsində 2 əsgər və 2 polis şəhid olub.

Şırnak vilayətinin İdil qəsəbəsində isə PKK-ya qarşı əməliyyat zamanı 4 terrorçu məhv edilib.

Bütün bunlar Türkiyənin yeni faciələr yaşa biləcəyinin ilkin anonslarını verib. Qardaş ölkədə bütün təhlükəsizlik qurumları gərgin iş rejiminə keçiblər. Ankara faciəsini törədən terrorçu Salih Necarın PKK-nın Suriyadakı “PYD” və “YPG” qollarının üzvü olduğu artıq dəqiqləşib. Türkiyə prezidenti Rəcəb Tayyib Ərdoğan və baş nazir Əhməd Davudoğlu bunu açıq şəkildə bəyan ediblər. Xarici işlər naziri Mövlud Çavuşoğlu Bakıda həmkarı Elmar Məmmədyarovla görüşü zamanı açıq şəkildə Suriyadakı PYD rəhbərinin Bəşər Əsəddən təlimat aldığını bildirib: “PYD/YPG-nin tərkibində Qəndildən gələn PKK-çılar var. Bizdə kəşfiyyat məlumatları var. PYD lideri Saleh Müslim Suriya rejimi  tərəfindən Qəndildən çağrılıb. Türkiyəyə qarşı hücumlar təşkil etmək üçün bir başa Əsədin özündən təlimat alır. Bütün sənəd və məlumatlar bizdə mövcuddur”.

Qeyd edək ki, Ankara faciəsində Rusiya izi axtaranların sayı durmadan artır. Xüsusilə, Ərdoğanın Azərbaycana, eləcə də, Davudoğlunun Brüsselə səfərləri ərəfəsinə hadisənin təsadüf etməsi, belə iddiaların sayının çoxalmasına səbəb olub. Terrorçunun PKK-nın Suriya qoluna məxsus olması, terror aktının Türkiyədə Hərbi Təyyarəçilər Günü baş verməsi faciədən Rusiyanın xəbərdar olması ehtimallarını gücləndirib. Doğrudur, şimal qonşumuzun rəhbərliyi səviyyəsində terror aktı kəskin şəkildə pislənilib və qardaş ölkəyə, eləcə də, faciə nəticəsində ölənlərin yaxınlarına başsağlığı verilib. Lakin bu da Rusiyanın Ankara faciəsində əlinin olması ehtimallarını azaltmayıb. Son üç ayda Rusiya-Türkiyə münasibətlərinin kritik həddə çatmasının terrorda rus izinin axtarılmasına səbəb olduğu sirr deyil. Təsadüfi deyil ki, Ankara faciəsinin Rusiya ilə əlaqəsinin olması barədə hələ ki bir sübut yoxdur. Bəlkə də var, amma ictimaiyyət xəbərsizdir…

Amma nədən Ankara terrorunu törədilən kimi gözlərin Rusiya tərəf dikilməyi suallar doğurur.

Politoloq Qabil Hüseynli Ankara terrorunda Rusiyanın əlinin olmasını düşündüyünü söylədi: “Müxtəlif faktlara söykənərək bu qənaətə gəlmişəm. Bu faktlardan birincisi odur ki, Rusiya son vaxtlar hər vasitə ilə Türkiyə ilə münasibətləri gərginləşdirməyə səy göstərir. Hətta Türkiyəni hərbi qarşıdurmaya yönləndirməyə çalışır. Bu məqsədlə Rusiya müəyyən hazırlıqlar da görür. Ermənistana silah göndərilməsinin miqdarını xeyli dərəcədə artırıb. Sözün həqiqi mənasında Ermənistan silah deposuna çevrilir. Eyni zamanda, Şimali Qafqazda 5-ci ordu deyilən yeni qüvvə formalaşdırılır. Bunlar Türkiyə ilə döyüş üçün nəzərdə tutulmuş ordu hissələridir. Krımda isə Rusiyanın artıq hərbi bazası, taktiki nüvə silahları var. Sanki Rusiya yeni dünya müharibəsinə hazırlaşır. Düzdür, Türkiyə tərəfi müharibə istəmədiyini deyir. Amma bildirirəm ki, Ankara terrorunun törədilməsində dünyanın böyük güclərindən birinin əli olduğu görünür. Çox yüksək səviyyədə hazırlanmış bir terror aktıdır. Terror baş verən gün Türkiyə Hərbi Hava Qüvvələrinin bayramı hesab olunurdu. Hərbiçilərin nə zaman hadisə baş verən yerdən keçəcəyini, özü də avtomobildə olanların çoxunun yüksək rütbəli hərbiçilər olacağını yalnız güclü kəşfiyyat nəticəsində müəyyən etmək olardı. Burada kəşfiyyatın bütün növlərindən istifadə ediblər. Avtomobildəki partlayıcı maddələrə diqqət yetirsək, o qədər ağır maddənin Türkiyəyə gətirilməsi elə də asan məsələ deyil. Bunu yük maşını ilə gətirmək də mümkün deyil. Görünür, partlayıcı maddələri hissə-hissə minik maşınında gətiriblər. Hadisəni törədən terrorçunun ciddi sürətdə təlimatlandırıldığı da görünür. O kürd uzun müddət hazırlıq keçib”.

Politoloq terror ətrafında cərəyan edən iddialara da münasibət bildirdi: “Bu iddialar doğru yozmalardır. Ərdoğanın Bakıya səfərinin kökündə nələrin durduğunu Rusiyadan yaxşı bilən olmazdı. Rusiya yaxşı bilirdi ki, Ərdoğan Bakını Müsəlman İttifaqına qoşmağa cəhd edəcək. Üstəlik Davudoğlu da Brüsselə gedəcəkdi. Miqrasiya məsələləri müzakirə olunacaqdır. Miqrant məsələlərinin əsl səbəbkarının Rusiya olduğu birmənalı şəkildə Qərb dövlətləri tərəfindən vurğulanır. Brüsseldə Rusiyanın ciddi şəkildə tənqid ediləcəyi, ondan Suriyada hava hücumlarının dayandırılmasının tələb ediləcəyi gözlənilirdi. Burada da ən çox arqumentlərlə çıxış edəcək, Rusiyanı faktlarla ifşa edəcək şəxs Türkiyənin baş naziri idi. Ərdoğanın Bakı, Davudoğlunun Brüssel səfərinə yalnız Rusiya mane ola bilərdi. Yüksək peşəkarlıqla hazırlanan  bu əməliyyat Rusiya, istərsə də, ABŞ kimi iri dövlətlər tərəfindən təşkil oluna bilərdi”.

Q.Hüseynli terrorçunun YPG üzvü olmasının təsadüf olmadığını da qeyd etdi: “Terrorçunun kürd olması aşkarlanıb. Bu şəxsi xüsusi olaraq, qaçqınlarla birlikdə sərhəddən keçiriblər. Yaxşı ki, sərhəddən keçərkən, onun barmaq izləri alınıb. Buna görə onun parçalanmış bədənin hissələri əsasında şəxsiyyəti müəyyən edilib. Kürdlərin bu təşkilatlarını SSRİ dövründə ruslar yaradıblar. Onlar da maliyyələşdirirdilər”.

Onu da qeyd edək ki, Ankara terror baş verdiyi andan Türkiyə ordusu PKK terror təşkilatının Suriya qolu olan PYD-nin mövqelərini güclü artilleriya atəşinə tutub. Hazırda əməliyyatlar davam edir.

Türkiyənin bölgədə keçirdiyi əməliyyatlardan sonra ABŞ tərəfinin sərgilədiyi ikili mövqe qardaş ölkənin səbir kasasını doldurub. Ankara faciəsinə münasibət bildirən ABŞ Dövlət Departamentinin sözçüsü Con Kirbi açıq şəkildə Türkiyədən Suriya ərazisindəki YPG düşərgələrini top atəşinə tutmağı dayandırmağı xahiş edib: “Türkiyənin dünyanın terror təhlükəsi ilə üz-üzə qalan hər hansı ölkəsi kimi xalqını hücumlardan qorumaq üçün bütün mümkün  imkanlardan istifadə etmək haqqı var. Hazırda YPG-nin Suriyada daha konstruktiv addımlar atmasını və Türkiyənin sərhədin qarşı tərəfindən top atəşlarını dayandırmasını arzulayırıq”.

C.Kirbi bildirib ki, Suriyada İŞİD-a qarşı effektli mübarizəni kürd döyüşçülər aparır. Departament sözçüsü Türkiyənin kürd döyüşçülərin ölkə sərhədlərinə yaxınlaşmasından keçirdiyi narahatlığı başa düşdüklərini diqqətə çatdırıb: “Biz kürdlərlə danışıqlar aparmağa davam edəcəyik. Suriyada kürdlərə yarım muxtariyyət verilməsini dəstəkləmirik”.

Amerikanın son günlərdəki mövqeyi Türkiyə tərəfdən birmənalı qarşılanmayıb. Prezident Ərdoğan PKK məsələsində ABŞ-ın konkret mövqe qoymasını, əks təqdirdə, Türkiyə kimi bir müttəfiqi itirəcəyinin anonsunu verib.