Albares Körfəz ölkələrinə diplomatik səfərə gedəcək

İspaniyanın xarici işlər naziri Jose Manuel Albares Yaxın Şərqə sülh gətirmək məqsədi ilə sabah Körfəz ölkələrini əhatə edən diplomatik tura gedəcək.
Elchi.az xəbər verir ki, İspaniya hökumətindən verilən açıqlamada Albaresin Körfəz ölkələrində ilk dayanacağının Qətər olacağı bildirilib.
Albares paytaxt Dohaya yola düşməzdən əvvəl sabah səhər saatlarında İspaniya Parlamentinin Beynəlxalq İnkişaf Əməkdaşlıq Komissiyasının fövqəladə iclasına qatılacaq və məlumat verəcək.
İspaniyalı nazir həftə ərzində verdiyi açıqlamalarda İsrailin Qəzzaya hücumlarının bölgənin digər ölkələrinə yayılmasından, xüsusilə Yəməndəki hadisələrdən çox narahat olduğunu bildirib.
İsrail və HƏMAS arasında dərhal və qeyd-şərtsiz atəşkəs və girovların dərhal azad edilməsini tələb edən İspaniya hökuməti Fələstin dövlətinin tanınmasını və iki dövlətli həll əsasında beynəlxalq sülh konfransının keçirilməsini təklif edir.

Nuranə Məmmədova