Afrikada baş qaldıran misli görüməmiş Ebola virusu epidemiyası fəlakətli miqyas alır.
Virtualaz.org saytı xəbər verir ki, virusun yayıldığı ölkələrdən birinin – Liberiyanın prezidenti Ellen Conson-Serlif CNN telekanalına müsahibəsində beynəlxalq birliyi ölkəsinə kömək etməyə çağırıb və vəziyyətin fəlakət həddində olduğunu bildirib.
“Bütün ölkəni qorxu və təşviş bürüyüb. Ölənlərin cəsədləri hər yerdə tökülüb qalıb. Situasiya çox ciddidir və fəlakət həddinə yaxınlaşır” – deyə prezident bildirib.
E.Conson-Serlif beynəlxalq ictimaiyyəti xəstəliklə mübarizə aparmaq üçün daha çox həkim və tibbi yardım göndərməyə çağırıb.
Ölümcül Ebola virusu Liberiya ilə yanaşı Syerra-Leonedə və Qvineyada da yayılıb. Habelə virusun Avropa ölkələrinə sıçraması faktları var. Britaniyada və Fransada hər birində azı bir nəfər olmaqla bu virusa yoluxma qeydə alınıb.
Qeyd edək ki, Ebola virusu insanda titrətmə, şiddətli qızdırma, dişlərin dibindən və daxili orqanlardan qanaxma, ürəkbulanması, diareya simptomları yaradır və çox keçmədən ölümə səbəb olur. Bu virusa yoluxanların 90 faizdən çoxu ölüb. Virusa qarşı heç bir peyvənd və effektiv müalicə mövcud deyil. Virus əleyhinə pereparatların heç biri Ebolaya təsir etmir.
Rəsmi statistikaya görə, indiyədək 800-dən çox adam ölüb, lakin ölənlərin sayı bundan qat-qat çox ola bilər.
Məlumata görə, Liberiya prezidenti Conson-Serlif və onun Syerra-Leonedən olan həmkarı Ernest Bey-Koroma gələn həftə Qvineyada keçiriləcək ABŞ-Afrika sammitində iştirak etməməyə qərar veriblər. Qvineya prezidenti Alfa Kondenin isə Vaşinqtona gözlənilən səfəri təxirə salınıb. Liberiya hökuməti virusun yayılmasının qarşısını almaq üçün bütün sərhəd məntəqələrini və məktəbləri bağlayıb.