Bildirilir ki, Fransada oktyabrın 17-də başlayan etiraz aksiyaları zamanı dağıntı törətmək və ya talançılıq etməkdə şübhəli bilinən 149 nəfər saxlanılıb.
Elchi.az xəbər verir ki, Fransanın ədliyyə naziri Jerald Darmanen vəziyyəti qiymətləndirmək məqsədilə ölkənin şimalındakı Lill şəhərinə səfər edib. Həftəsonu “Sarı jiletlilər”in (gilets jaunes) etiraz aksiyaları zamanı bu şəhərdə zorakılıq halları baş vermişdi.
Səfəri çərçivəsində Lill Məhkəməsində mətbuata açıqlama verən Darmanen, “Sarı jiletlilər”in nümayişləri ilə əlaqəli zorakılıqlara qarşı məhkəmə orqanlarının reaksiyasından məmnun qaldığını bildirib.
Dağıntı və ya talançılıqda iştirak edən 149 şübhəlinin saxlanıldığını qeyd edən Darmanen, prokurorlara göstəriş verdiyini bildirib: o, prokurorlardan təlimatlarına uyğun gəlməyən məhkəmə qərarlarına qarşı şikayət vermələrini tələb edib.
Yerli mətbuatın məlumatına görə, paytaxtda həftəsonu yüksək yaşayış xərclərinə qarşı keçirilən etiraz aksiyaları zamanı iki nəfərin ölümü ilə bağlı araşdırmalara başlanılıb.
Paris Polis Prefekturasının məlumatına əsasən, oktyabrın 17-də Parisdəki Respublika Meydanı (Place de la République) yaxınlığında 59 yaşlı bir şəxs huşsuz vəziyyətdə tapılıb.
Həmin şəxs təcili tibbi yardım müəssisəsinə çatdırılsa da, göstərilən bütün tibbi müdaxilələrə baxmayaraq, dünyasını dəyişib.
Bundan əlavə, ilkin məlumatlara görə, oktyabrın 19-u səhər saat 01:10-da Parisdəki Berje küçəsində (Rue Berger) 48 yaşlı bir şəxsin cəsədi aşkar edilib; həmin şəxsin əvvəlcə səhhətinin pisləşdiyi bildirilir.
Şayəstə
