ABŞ Prezidenti Donald Tramp ölkənin süni intellekt sahəsindəki liderliyini gücləndirmək, həmçinin bu texnologiyanın yaratdığı riskləri və imkanları qiymətləndirmək məqsədilə “Super İntellekt Qüvvəsi” (Super Intelligence Force) adlı yeni bir işçi qrupu yaratdı. Quruma rəhbərlik etmək üçün Milli Kəşfiyyat Direktoru Cey Kleyton təyin edilib və komanda 120 gün ərzində əhatəli hesabat hazırlamalıdır.
Elchi.az xəbər verir ki, ABŞ Prezidenti Donald Tramp süni intellekt siyasətinə nəzarət etmək üçün “Super İntellekt Qüvvəsi” adlı yeni işçi qrupunun yaradıldığını elan etdi. Tramp Milli Kəşfiyyat Direktoru Cey Kleytonu administrasiyanın süni intellekt üzrə məsul rəsmisi təyin etdi. Kleyton ABŞ-ın süni intellekt sahəsindəki liderliyini qoruyub saxlamağı hədəfləyən yeni “Super İntellekt Qüvvəsi”nə rəhbərlik edəcək və komanda 120 gün ərzində texnologiya ilə bağlı riskləri və imkanları qiymətləndirən hesabat hazırlayacaq.
Dünən sosial media hesabında paylaşım edən Tramp bildirdi ki, bu missiyanın məqsədi “Amerikanın super intellekt sahəsində dünyaya liderlik etməyə davam etməsini təmin etmək” və “bütün amerikalıların maraqlarını qoruyarkən onların həyat şəraitini yaxşılaşdırmaq”dır. O qeyd etdi ki, yeni qurum ABŞ-a texnologiya inkişafında liderliyini qoruyub saxlamağa və hökumətin ictimaiyyətlə əlaqələrini əlaqələndirməyə imkan verəcək.
Avqust ayında Milli Kəşfiyyat Direktoru təyin edilən Kleyton Amerika mətbuatına açıqlamasında bildirdi ki, yeni işçi qrupu 120 gün ərzində süni intellektin yaratdığı riskləri və imkanları qiymətləndirən hesabat hazırlayacaq. “Super İntellekt Qurumu” (Superintelligence Authority) federal hökumətin istehlakçılar, ictimai maraq qrupları, dini təşkilatlar, kritik infrastruktur təchizatçıları və super intellekt şirkətləri ilə əlaqələrini əlaqələndirəcək.
Şayəstə
