Cənubi Koreya Prezidenti Li Çe-myun (Lee Jae-myung) Ukraynanı iki Şimali Koreyalı hərbi əsirin Cənubi Koreyaya təhvil verilməsi faktını açıqladığına görə rəsmi üzr istəməyə çağırdı və əks təqdirdə, dəqiqləşdirilməmiş “əlavə addımlar” atacağı ilə hədələdi.
Elchi.az xəbər verir ki, Ukrayna Prezidenti Vladimir Zelenskinin keçən həftə BMT Baş Assambleyasında etdiyi çıxış Seul administrasiyasında narazılıq yaratdı; belə ki, Seul həmin təhvil prosesinin məxfi saxlanılmasında israr etmişdi.
Ukraynanın xarici işlər naziri Andrey Sibiha cümə axşamı günü vəziyyəti “diplomatik anlaşılmazlıq” kimi qiymətləndirdi və Kiyevin məsələni həll etməyə çalışdığını bildirdi.
Lakin Prezident Li bu yanaşmanı rədd edərək, məsələnin “Koreya xalqının və millətinin şərəfi” ilə bağlı olduğunu bəyan etdi.
Məxfilik sazişi ilə bağlı mübahisə
Cənubi Koreya Prezident Administrasiyası bildirdi ki, təhvil prosesinin gizli saxlanılması tələbi Ukraynadan gəlib; bu qərar Şimali Koreyalı əsgərlərin ailələrini qorumaq və Kiyevin həmin əsgərləri öz əsirləri ilə dəyişdirmək fürsətini əldən verməsi ilə bağlı tənqidlərin qarşısını almaq məqsədilə qəbul edilib.
Zelenskinin ofisi iki ölkə arasında belə bir məxfilik sazişinin mövcud olmadığını bəyan edərək gərginliyi daha da artırdı.
Məlumata görə, Ukrayna müharibəsində Rusiyaya dəstək verən minlərlə Şimali Koreya əsgərindən ikisi olan və Cənubi Koreyaya göndərilən həmin əsgərlər daha əvvəl yerli mediaya Cənubi Koreyaya getmək istədiklərini bildirmişdilər.
Şayəstə
