ABŞ prezidenti Donald Trampın bu gün Çində keçirəcəkləri görüşdə həmkarı Si Cinpinlə Yaxın Şərqdəki müharibə, Tayvan məsələsi və ikitərəfli ticarət-iqtisadi məsələləri müzakirə etməsi gözlənilir.
Elchi.az xəbər verir ki, ABŞ prezidenti Donald Tramp dünən gecə Çinin paytaxtı Pekinə siyasi heyəti və biznes nümayəndələrinin də daxil olduğu böyük bir nümayəndə heyəti ilə gəlib.
Bu gün Çin parlamenti olan Xalq Yığıncaqlarının Böyük Zalının yerləşdiyi Tiananmen Meydanında Prezident Tramp üçün dövlət mərasimi keçiriləcək. Mərasimdən sonra Tramp Çin prezidenti Si Cinpinlə ikitərəfli və nümayəndə heyəti səviyyəsində görüşlər keçirəcək.
İkitərəfli ticarət və iqtisadi məsələlərlə yanaşı, Tramp və Si Cinpin arasındakı görüşdə ABŞ və İsrailin İrana hücumları ilə başlayan müharibə və Çinlə suverenlik mübahisəsində olan Tayvanın vəziyyəti də müzakirə olunacaq.
İkitərəfli ticarət və iqtisadi məsələlər
Səfərdən əvvəl Ağ Evin verdiyi açıqlamada bildirilib ki, ABŞ tərəfi səfər zamanı aviasiya, kənd təsərrüfatı və enerji sahələrində yeni razılaşmaların əldə olunmasını gözləyir.
Çinin ABŞ-dan Boeing sərnişin təyyarələri, soya və mayeləşdirilmiş təbii qaz alması üçün müqavilələr imzalanması ehtimalı var.
ABŞ və Çin arasındakı münasibətlər Trampın ikinci dövründə genişlənən bir sıra fikir ayrılıqlarına qarışıb. Bir tərəfdən Vaşinqton administrasiyası tarif artımları və texnologiya məhdudiyyətləri tətbiq edib, digər tərəfdən isə Çin qlobal bazarın böyük bir hissəsini təmin etdiyi nadir torpaq elementlərinə nəzarət etmək üçün addımlar atıb.
Tərəflər iki ölkə liderlərinin ötən ilin oktyabr ayında Cənubi Koreyanın Busan şəhərində keçirilən görüşündə tariflər, ixrac nəzarəti və digər mübahisəli məqamlar üzrə əldə etdikləri müvəqqəti razılaşmanı qorumağa diqqət yetirəcəklər. Onlar həmçinin ABŞ-da asılılıq epidemiyasına səbəb olan narkotik maddələr, xüsusən də fentanil və onun prekursorları sahəsində əməkdaşlığın davam etdirilməsini, eləcə də süni intellekt təhlükəsizliyini və iki ölkə arasında daha az həssas ticarət və iqtisadi məsələləri həll etmək üçün “Ticarət Şurası” və “İnvestisiya Şurası”nın yaradılması təkliflərini müzakirə edəcəklər.
Şayəstə
