NATO, İranla münaqişə və transatlantik ixtilafların artması kimi mövzuların əsas gündəm olacağı gözlənilən Ankara sammitinə Fars körfəzinin dörd ölkəsini dəvət etməyi planlaşdırır.
Elchi.az xəbər verir ki, bu barədə “Bloomberg” agentliyi öz mənbələrinə istinadən məlumat yayıb.
Agentliyin həmsöhbətlərinin sözlərinə görə, NATO-nun Yaxın Şərq ölkələri ilə tərəfdaşlıq formatı olan “İstanbul Əməkdaşlıq Təşəbbüsü”nün iştirakçıları — Bəhreyn, Küveyt, Qətər və BƏƏ dəvət ala bilərlər.
Gözlənilir ki, bu dövlətlərin xarici işlər nazirləri iyulun 7–8-də Ankarada keçiriləcək görüşdə iştirak edəcəklər.
Sammit İran ətrafındakı müharibə və regional siyasətlə bağlı fikir ayrılıqları səbəbindən NATO daxilində gərginliyin artdığı bir vaxtda baş tutur. ABŞ Prezidenti Donald Tramp daha əvvəl müttəfiqlərini Hörmüz boğazı ilə bağlı məsələlərdə kifayət qədər fəal olmamaqda tənqid etmiş, həmçinin Almaniyadakı Amerika hərbi mövcudluğunun azaldılacağını elan etmişdi.
Mənbələrin bildirdiyinə görə, ardıcıl ikinci ildir ki, görüş alyans daxilində mövqelərin uzlaşdırılmasına yönəlmiş daha yığcam və sadələşdirilmiş formatda keçirilə bilər.
Məryəm
