Pakistan Müdafiə Nazirliyi açıqlamasında deyilir: “Səbrimiz tükənib; Əfqanıstanla açıq müharibəyə girmişik.”
Elchi.az xəbər verir ki, Pakistan və Əfqanıstan arasında Durand Xətti boyunca baş verən toqquşmalar qarşılıqlı açıqlamalarla yeni səviyyəyə yüksəlib. Hər iki tərəf ağır itkilər verdiyini və çoxsaylı hərbi hədəflərin vurulduğunu iddia edir.
27 mövqenin məhv edildiyi iddiası
Pakistanın informasiya naziri Attaullah Tarar Kabil, Paktiya və Qəndəhardakı bəzi hədəflərin vurulduğunu və ölənlərin sayının arta biləcəyini bildirib.
Tarar əməliyyatlarda 27 mövqenin məhv edildiyini və 9 nöqtənin ələ keçirildiyini iddia edərək, iki korpus və üç briqada qərargahı da daxil olmaqla bir çox hərbi hədəfin vurulduğunu və 80-dən çox nəqliyyat vasitəsinin və silahın istifadəyə yararsız hala düşdüyünü əlavə edib.
Tarar həmçinin Əfqanıstana qarşı qisas tədbirlərinin davam edəcəyini vurğulayıb.
“Artıq aramızda açıq müharibə var”
Pakistanın müdafiə naziri Xavaca Məhəmməd Asif sosial media platforması X-də verdiyi açıqlamada NATO qüvvələrinin çıxarılmasından sonra Əfqanıstanda sülhün gözlənildiyini, lakin bunun baş vermədiyini iddia edib. Taliban rejimini hədəf alan Asif, onların “Əfqanıstanı Hindistanın müstəmləkəsinə çevirdiklərini” bildirdi.
Pakistanın diplomatiya yolu ilə “hər şeyi normal saxlamağa” çalışdığını bildirən Asif, “Səbrimiz tükənib” dedi və “İndi aramızda açıq müharibə var” sözləri ilə gərginliyin çatdığı nöqtəni açıqladı.
Pakistanın daxili işlər naziri Möhsün Nəqvi də Əfqanıstanın hücumlarını qınadığını açıqladı.
Şayəstə
