“Havanın çirkli olması bir çox xəstəliklərin yayılmasının əsas səbəblərindən biridir. Ekspertlər hesab edir ki, çirkli hava daha çox ürək-damar və tənəffüs sistemi xəstəliklərinin yaranmasına səbəb olur”. Bunu Elchi.az-a açıqlamasında Yaşıl Dünya” Ekoloji Maarifləndirmə İctimai Birliyinin sədri Elman Cəfərli deyib.
O, həmçinin əlavə edib:”Bu gün 2 milyon 300 mindən çox əhalisi olan Bakı şəhərində havanın təmizliyi prioritet məsələ olmalıdır. Paytaxtda havanın çirklənməsinin əsas səbəblərindən tikinti, avtomobillərin çoxluğu, küçələrin, yolların yuyulmaması və digər amilləridir. Sovet dönəmində Bakının mərkəzi küçələri səhər tezdən yuyulardı. Yəqin Sovet dövründə çəkilmiş bədii və sənədli filmlərdə Bakı küçələrinin yuyulduğunu görmüsüz. Fikrimcə, Bakı və Abşeronda texniki su şəbəkəsi bərpa edilməli və şəhərin küçələri yuyulmalıdır”.
E.Cəfərli həmçinin son illər Bakıda avtomobillərin sayının da artığını vurğulayıb:
“2000-ci ildə Bakı şəhərində 100 min maşın var idisə, 2017-ci ildə bur rəqəm bir milyona çatıb. Atmosferə atılan tullantıların 1990-cı ilərdə 70-80 faizi sənaye müəsissələrinin, 30 faizi isə nəqliyyat vasitələrinin payına düşürdüsə, bu rəqəm indiki zamanda yerini dəyişib.
Bəzi ekspertləri hava çirkliliyinin qarşısını almaq üçün avtomobillərin sayını azaltmağı təklif edirlər. Lakin məncə bu real görünmür. Qadağa mərkəzi küçələrə şamil edilə bilər. Məsələn, şəhərin mərkəzinə yalnız taksi xidməti göstərən elektromobil minik avtomobilləri və miktoravtosbuslar buraxıla bilər. Bu günlərdə Bakı şəhərinə ilk elektrik mühərrikli avtobus gətirilib. Qeyd edim ki, dünyanın aparıcı elektrik mühərrikli avtobuslar istehsalçısı olan Çinin BYD şirkətindən test məqsədilə alınan 1 ədəd elektrik avtobusu 12 metrlikdir. 33 sərnişin oturacağına malik avtobusun ümumi sərnişin tutumu 82 nəfərdir. Batareya gücü 383 kVts olan avtobus tam enerji dolumunda 350 km məsafə qət edə bilir. Nəqliyyat vasitəsi müasir sərnişindaşıma tələblərinə tam cavab verir. Qeyd edək ki, Avropada təmiz, alternativ yanacaqlı avtobusların geniş miqyaslı tətbiqini təşviq etmək üçün Təmiz Avtobus Bəyannaməsini (BUS2025) imzalanıb. Belə ki, dünya yollarında hərəkət edən avtobusların təqribən yarısı növbəti 5 il ərzində tamamilə elektrik avtobuslara keçidi planlaşdırılır. Qonşu Gürcüstan paytaxt Tiflisin nəqliyat sistemində elektromobillərə üstünlük verir. Biz də bu prosesi sürətləndirməliyik. Bakı və Abşeronda havanın çirkliyinin qarşısını almaq üçün atılmalı ən mühüm addım yaşıllıqların salınmasıdır. Paytaxtın bir sıra ərazilərində “Stalinka”, “Xruşşovka” adlanan binaların sökülməsi nəzərdə tutulur. Həmin ərazilərdə yəqin ki yeni binaların, göydələnlərin tikilməsi nəzərdə tutulur. Məncə, istifadə müddəti bitmiş binaların yerində parklar yaradılmalı, çoxlu ağaclar əkilməlidir”.
Havar Şəfiyeva
Son şərhlər