ADA Universitetində BMT Baş Assambleyasının (BA) Prezidenti Abdulla Şahidin Qoşulmama Hərəkatının Gənclər Şəbəkəsinin üzvləri ilə görüşü keçirilib.
Açılışda çıxış edən ADA Universitetinin rektoru Hafiz Paşayev deyib ki, bu, Abdulla Şahidin Azərbaycana ikinci səfəridir.
O, daha əvvəl Maldivin xarici işlər naziri kimi Qoşulmama Hərəkatının sammitində iştirak edib.
Daha sonra BMT Baş Assambleyasının Prezidenti Abdulla Şahid çıxış edib.
O bildirib ki, gənclər üzləşdikləri qlobal problemlərə baxmayaraq, optimistdirlər, onlar daha yaxşı, daha parlaq gələcək axtarırlar. Onlar prosesə öz töhfələrini verməyə çalışırlar və bu yolda onların səsi eşidilməlidir.
BMT Baş Assambleyasının Prezidenti deyib ki, gəncliyin fəal iştirakı onun gündəliyində prioritetlərdən biridir.
O qeyd edib ki, gənclərin qlobal çoxtərəflilikdə iştirakı dayanıqlılığı gücləndirir: “Sizin təkliflərinizi, qlobal problemlər üçün təklif etdiyiniz həll yollarını eşitmək istəyirik”.
Abdulla Şahid vurğulayıb ki, dünyanın müxtəlif nöqtələrində – Əfqanıstanda, Suriyada, Ukraynada münaqişələr davam edir və qlobal gənclik bu münaqişələrə reaksiya verməli, bu istiqamətdə fəal olmalıdırlar.
Son şərhlər