TikTok-un ana şirkəti olan ByteDance-in təsisçisi Çjan Yimin (Zhang Yiming) 105,5 milyard dollarlıq sərvəti ilə Asiyanın ən varlı insanı titulunu qazandı. Bloomberg-in məlumatlarına görə, çinli sahibkar xalis sərvəti 104,8 milyard dollar olan hindistanlı iş adamı Qautam Adanini geridə qoyub.
Elchi.az xəbər verir ki, şirkətin təxminən 21%-nə sahib olan Çjanın sərvəti, BlackRock və Fidelity tərəfindən aparılan yeni qiymətləndirmələrdən sonra təkcə bu ay 12 milyard dollar artıb.
Bloomberg 2019-cu ildə onun sərvətini izləməyə başlayanda xalis dəyəri 13 milyard dollar olan Çjan, son yeddi il ərzində aktivlərini təxminən səkkiz dəfə artırıb.
Süni intellektə yatırılan investisiyalar artımı təmin etdi
Bildirilir ki, ByteDance TikTok və Douyin kimi məşhur platformalarından əldə edilən məlumatlardan istifadə edərək süni intellekt modellərini təkmilləşdirir və texnologiya sektorunda əhəmiyyətli irəliləyişlər əldə edir.
ABŞ-da tənzimləyici maneələrlə və potensial giriş qadağaları ilə bağlı böhranla üzləşməsinə baxmayaraq, şirkət süni intellektə investisiya qoymağa davam edib.
Omdia tədqiqat şirkətinin aparıcı analitiki Lian Cye Su (Lian Jye Su) bildirib ki, Çjan düzgün addımlar atıb və süni intellektə yatırılan investisiyaları qətiyyətlə artırıb.
Süni intellekt sərvətləri dəfələrlə artırır
Süni intellekt texnologiyasındakı irəliləyişlər qlobal milyarderlər siyahısını sürətlə dəyişdirir. Dell Technologies-in təsisçisi Maykl Dell süni intellektə yönəlmiş serverlərdən əldə edilən gəlirlər sayəsində sərvətini 262 milyard dollara çatdıraraq dünyanın beşinci ən varlı insanı olub. Eyni zamanda, Google-un həmtəsisçisi Larri Peyc Gemini 3 süni intellekt modelinin elan edilməsindən sonra xalis sərvətini 252 milyard dollara çatdıraraq, ötən il Ceff Bezosu geridə qoyub.
Şayəstə
