İslaminsesi bildirir ki, bu barədə Qaynar.info-ya etibarlı mənbədən bildirilib.
Xatırladaq ki, ölkə başçısı İlham Əliyev Nazirlər Kabinetinin srağagün ölkədəki iqtisadi-sosial vəziyyətə həsr edilmiş fövqəladə iclasında geniş özəlləşdirmə proqramı barədə tapşırıqlar verib.
“Geniş özəlləşdirmə proqramı hazırlanmalıdır, müvafiq göstərişlər verilmişdir. Biz həm xarici, həm yerli investorları bu işə cəlb etməliyik. Hələ ki, Azərbaycanda bir çox özəlləşdirilməmiş müəssisələr var və onların fəaliyyəti dayanıbdır. Bəzi hallarda bu müəssisələr yarıdağılmış vəziyyətdədir, onların çox böyük torpaq sahələri var. Biznes mühitini yaxşılaşdırmaq və iqtisadi canlanmanı sürətləndirmək üçün mütləq geniş özəlləşdirmə proqramı həyata keçirilməlidir. Bu proqram tam şəffaf keçirilməlidir, beynəlxalq ekspertlər bu işə cəlb olunmalıdır. Yerli və xarici investorlar üçün elə şərait yaratmalıyıq ki, onlar böyük maraqla, həvəslə vəsait qoysunlar. Nəzərə alsaq ki, Azərbaycanın uzunmüddətli uğurlu inkişafı heç bir investorda şübhə doğurmur, Azərbaycan iqtisadiyyatı dayanıqlı şəkildə inkişaf edəcək. Burada həm neft-qaz amili var, həm də Azərbaycanda qeyri-neft sektorunun inkişafı sürətlə gedir. Keçən il Azərbaycanda qeyri-neft sənayesi 8 faizdən çox artmışdır. Bu, görülən işlərlə bağlı olan nəticədir. Ona görə yenə də demək istəyirəm, elə şərait yaratmalıyıq ki, xarici və yerli investorlar bu özəlləşdirmə proqramında böyük maraqla iştirak etsinlər” deyə İ.Əliyev bildirib.
Mənbəmiz xatırladır ki, hələ bir neçə ay əvvəl Azərbaycanda bəzi dövlət müəssisələrinin özəlləşdirilməsi məsələsi gündəmə gətirilmişdi. Bu sırada AZAL-ın adı xüsusi hallanırdı.
“Başda “Azərbaycan Hava Yolları” olmaqla bir sıra QSC dövlət büdcəsinə əlavə yük təşkil edirlər. Amma keçən ilin payızında AZAL-ın özəlləşdirilməsi ilə bağlı təkliflər daha yüksəkdən səsləndsirilməyə başlanıldıqdan sonra hökumətdən bun amənfi reaksiya gəldi. Məsələn, maliyyə naziri Samir Şərifov açıq mətnlə dedi ki, “AZAL-ın özəlləşdirilməyə çıxarılması, özəl hava şirkətlərinin yaradılması o qədər də uğurlu variant deyil”.
Hesab edirəm ki, manatın ikinci və daha kəskin devalvasiyasından, neftin qiymətinin isə artıq 30- dolların da altına düşməsindən və Azərbaycanın gəlirlərinin misli görünməmiş şəkildə azalmasından sonra artıq hökumətdə də artıq bu məsələnin vacibliyini başa düşürlər. Ona görə də istər AZAL-ın, istərsə də “Azərenerji”, “Azərsu”, “Azəristiliktəchizat”, “Azərişıq” kimi digər qapalı səhmdar cəmiyyətlərinin özəlləşdirilməyə çıxarılması tamamilə realdır” deyə qaynağımız əlavə edib.
AZAL-ın dövlət borcu ən yüksək QSC olduğunu da xatırladan mənbəmizin sözlərinə görə, bu qurumun hava nəqliyyatındakı inhisarçı mövqeləri Azərbaycanın dövlət büdcəsinə, ümumiyyətlə isə ölkə iqtisadiyyatına xeyli baha başa gəlir:
“Yadınızdadırsa, ötən ilin sentyabrında hökumət “Azərbaycan Hava Yolları”nın borclarının əhəmiyyətli hissəsini silmişdi. İllərdir AZAL-a ayrılan dövlət investisiyaları, subsidiyalar və başqa güzəştlərə baxmayaraq, yenə də onun borclarının xalqın boynuna – dövlət büdcəsinə yüklənilməsinə heç bir məntiqi izah tapmaq mümkün deyil. Digər tərəfdən, AZAL-ın inhisarçı şirkət olması Azərbaycanda təyyarə biletlərinin baha olmasını şərtləndirən ən mühüm amillərdən biridir. Bu isə ölkəmizin xarici turistlər üçün cəlbediciliyini ciddi şəkildə azaldır. Bütün bunları ümumiləşdirdikdə AZAL-ın özəlləşdirilməytə çıxarılması qaçılmaz görünür”.
Beləliklə, “Azərbaycan Hava Yolları”nın özəlləşdirilməsi üçün iqtisadi əsaslar kifayət qədərdir. Qalır bu prosesə start verilməsi – onun nə vaxt baş verəcəyini indidən demək çətin olsa da, yəqin bunu çox gözləmək lazım gəlməyəcək…
O da maraqlıdır ki, “Azərbaycan Hava Yolları” QSC-nin prezidenti Cahangir Əsgərov rəhbərlik etdiyi qurumun özəlləşdirilməsi ilə bağlı təklifləri səssiz qarşılayır. Bu mövzu nə vaxt gündəmə gəlsə, AZAL rəsmiləri məsələ barədə susmağı və hər hansı açıqlama verməməyi tərcih edirlər.
Son şərhlər