Alman zabitlərinin Ukrayna müharibəsi və Kerç körpüsünün vurulması ilə bağlı sızdırılmış söhbət qeydləri “Putin bir daşla 3 quş vurdu” şərhinə səbəb olub. Müzakirələr Avropa daxilində parçalanmanı üzə çıxardı.
Rusiyanın Ukraynaya hücumu 3-cü ilini doldurarkən, mübarizə həm cəbhədə, həm də diplomatiyada yeni mərhələyə qədəm qoyub.
Elchi.az xəbər verir ki, “Russia Today” (RT) televiziyası Almaniya Hərbi Hava Qüvvələri komandanı İnqo Gerhartsın yüksək rütbəli ordu rəsmiləri ilə Ukrayna ilə bağlı keçirdiyi görüşün 40 dəqiqəlik səs yazısını dərc edib.
Yazıda Almaniyanın Ukrayna ordusuna uzaq mənzilli və dəqiq idarə olunan “Taurus” qanadlı raketləri göndərməsi müzakirə edilərkən, Ukrayna ordusunun Rusiya daxilində həssas nöqtələri vurması və Krımı Rusiya materikinə birləşdirən Kerç körpüsü ilə bağlı ssenarilər müzakirə edilib.
Çıxışın məzmunu həm Almaniya hökuməti, həm də media tərəfindən dolayısı ilə təsdiqlənsə də, Moskvanın Avropanın kövrəkliyini ortaya qoyan tənqidi addım atdığı hesab edilir .
Amerikanın “Politico” jurnalı Rusiya prezidenti Vladimir Putinin bir hərəkətlə üç kritik zərbə vurduğunu bildirib.
Ukrayna lideri Volodimir Zelenski hər fürsətdə ABŞ və Avropa ölkələrindən daha çox silah tələb edərkən, sızan səs yazısı Rusiyanın reaksiyasına onsuz da tərəddüd edən Avropa ölkələrini daha ehtiyatlı mövqeyə qoyub. Almaniya kanslerinin Ukraynada Fransa və İngiltərə ordularının fəaliyyət göstərməsi ilə bağlı paylaşdığı məlumat Moskva ilə üz-üzə gəlmək istəməyən Avropa ölkələrini Kiyevə hərbi yardım haqqında iki dəfə düşünməyə vadar edib.
Qalmaqaldan sonra Almaniyanın “Bild” qəzetində dərc olunan məqalədə Qərb ölkələri ilə Almaniya arasında etimad problemi ortaya çıxıb. Peter Tiedenin imzaladığı məqalədə Qərb ölkələri arasında “Bir şeyin Moskvanın qulağına çatmasını istəyirsənsə, almanlara de” ifadəsinin işlədildiyi, Qərb ölkələrinin alman kəşfiyyatına və siyasətçilərinə etimadsızlığının böyük olduğu bildirilib.
Nuranə Məmmədova
Son şərhlər