“Gənclər Təşkilatını dirçəldəcəyəm” Müsavat Partiyasının Gənclər Təşkilatının ( MGT) yeni müvəqqəti sədri Səma Qabulova Teleqraf.com-un suallarını cavablandırıb.
Qeyd: MGT-nin sədri Əhliman Abbas istefa verəndən sonra sədr postu boş qalıb. Bu posta bu gün yeni seçkilər keçiriləcək. Ə.Abbasın sədr seçildiyi seçkilər ötən il qalmaqalla müşayiət olunmuşdu. Rəqibi Rüfət Hacıbəyli onun sədrliyini qəbul etməyərək təşkilatın işində passiv iştiraka üstünlük vermişdi. Ə.Abbasın və bir neçə MGT üzvünün partiyadan ayrılmasından sonra R.Hacıbəyli özünün haqlı olduğunu dilə gətirib və bəyan edib ki, MGT-ni yalnız Tural Abbaslı və onun tərəfdarları dirçəldə bilər. Ötən gün isə sözügedən posta təyinat gerçəkləşib. Yazılanlara görə, sədr vəzifəsini Səma Qabulova icra edəcək.
Qısa tanıtım: O, 1993-cü ildə anadan olub. Bədən Tərbiyəsi və İdman Akademiyasının 3-cü kurs tələbəsidir. Atası uzun illərdir Müsavat Partiyasının üzvüdür. Sosial şəbəkələrdə ciddi müzakirə olunan S.Qabulova öncə barəsindəki məlumatlardan danışıdı:
– Səma xanım, Müsavat Gənclər Təşkilatının sədr postuna seçkilər bu gün keçiriləcək. Amma sizi yeni sədr kimi təqdim edirlər…
– Müsavat Gənclər Təşkilatına yeni sədri təşkilatın Şura üzvləri seçir. İstənilən Şura üzvü təşkilat sədri postuna namizədliyini verə bilərdi. Mən namizəd oldum. Vahid namizəd olduğum üçün mətbuatda yeni sədr kimi təqdim edilirəm. Amma seçki bu gün keçiriləcək və sədrliyim bu gün təsdiqlənəcək.
– Hazırda Gənclər Təşkilatı Şurasının nə qədər üzvü var?
– Şuranın istefa verən və fəaliyyətini dayandıran üzvlərindən başqa 11 üzv var.
– Seçki mətbuata açıq olacaq?
– Qapalı olacaq. Günün ikinci yarısında iclas keçiriləcək və sədr seçiləcək.
– Nə vaxtdan Müsavatın üzvüsünüz?
– 1 ildən çoxdur.
– Facebook-da sizin sədrliyiniz barədə xəbərlərə reaksiyalar birmənalı deyil. Yayılan fotolarınız barənizdə “qeyri-ciddi siyasətçi” kimi ifadələrə səbəb olub.
– Sosial şəbəkələrdə yazılanları oxumuşam. Məncə, xoş sözlər daha çoxdur, nəinki qeyri-etik ifadələr, tənqidlər və təhqirlər. Bütün deyilənlərə normal yanaşıram. Hər kəsin şəxsi fikri var. Sosial şəbəkələr azad məkandır, istənilən insan istənilən fikri irəli sürə bilər. Amma hər şeyi zaman göstərəcək.
– Ötən il Müsavat Gənclər Təşkilatına keçirilən seçkilər qalmaqallı oldu. Təşkilatda indi də qruplaşmaların olduğu deyilir. Siz təşkilatda əmin-amanlıq yarada biləcəksiz?
– Gənclər Təşkilatında qruplaşma olduğunu düşünmürəm. Mənim hər kəslə münasibətim yaxşıdır. Heç kimlə intriqam yoxdur. Hər halda özüm təşkilatın fəaliyyətini dirçəltmək üçün addımlar atacam. Təşkilatımızı gücləndirmək, gənclərin diqqətini bura cəlb etməyə çalışacam. Gənclər Təşkilatını qalmaqaldan uzaq edib əsas hədəfə yönləndirəcəm.
– Tural Abbaslının tərəfdarları Əhliman Abbasın sədrliyini qəbul etmirdi. Siz narazıları öz tərəfinizə çəkə biləcəksiz?
– Bunu Tural Abbaslıdan soruşun.
– Sədr siz olacaqsınız axı. Tural Abbaslı özü məsələlərə həmişə çox sakit və diplomatik yanaşır. Tərəfdarları isə çılğındır.
– Tural Abbaslının siyasəti əslində qəşəng siyasətdir.
– Əhliman Abbaslı ilə münasibətiniz necədir?
– O, sədrliyə namizəd olanda da sədrliyinə münasibətim normal olub.
– Arif Hacılının başqanlığını qəbul edirsiz?
– Əlbəttə, Arif Hacılının başqanlığını qəbul edirəm. Bu, bütün müsavatçıların qəbul etməli olduğu bir şeydir. Yeni başqandan çox razı qalacağıma əminəm.
– Siyasətə marağınız ailənizin təsirilə olub, yoxsa öz seçiminizdir?
– Bəlkə də valideynlərimin müsavatçı olmasının təsiri var, amma əsasən öz seçimimdir.
– Sizcə, xarici görünüşünüz yoxsa, fikirləriniz sədr seçilməyinizə yardımçı olacaq?
– Məncə, hər ikisi.
Son şərhlər