Ukrayna prezidenti Vladimir Zelenskinin Yaponiyada keçiriləcək G7 Liderlər Sammitində şəxsən iştirak edəcəyi bildirilir.
Elchi.az xəbər verir ki, Yaponiya hökuməti daha əvvəl videokonfrans vasitəsilə sammitə qatılacağı elan edilən Zelenskinin Xirosimaya gələcəyini açıqlayıb.
Sözügedən səfər Zelenskinin Rusiyanın hücumlarının başladığı 2022-ci ilin fevralından sonra Asiya regionuna ilk səfəri olacaq.
Yaponiya Xarici İşlər Nazirliyinin bəyanatında qeyd olunub ki, “Sammitin son günündə G-7 liderləri arasında Ukrayna ilə bağlı sessiyanın şəxsən Zelenskinin iştirakı ilə keçirilməsi qərara alınıb”.
Ukrayna lideri sammit çərçivəsində Yaponiyanın baş naziri Kişida Fumio ilə də görüşəcək.
Yaponiyanın ev sahibliyi etdiyi, ABŞ, Fransa, İngiltərə, Almaniya, Kanada və İtaliya liderlərinin qatılacağı sammit mayın 21-də başa çatacaq.
Sammitə Avropa İttifaqı (Aİ), İndoneziya, Hindistan, Cənubi Koreya, Avstraliya, Braziliya, Vyetnam liderləri və beynəlxalq təşkilatların nümayəndələri də dəvət olunub.
G7 qlobal siyasi və iqtisadi problemlərin həlli üçün mühüm beynəlxalq platformalardan biri hesab olunur.
Nuranə Məmmədova
Son şərhlər