“2005-ci ildən indiyədək yol nəqliyyat hadisələrinin sayı 33,1 faiz, bu hadisələrdə ölənlərin sayı 31,3 faiz, yaralananların sayı isə 32, 6 faiz artıb”.

Bunu Gəncə Təcili və Təxirəsalınmaz Tibbi Yardım Stansiyasının regional bölməsinin baş həkimi Sevinc Hüseynova bildirib.

Onun sözlərinə görə, statistik rəqəmlər Respublikamızda təcili yardım sahəsində yeni strukturun yaranmasına zəmin yaradıb.

“Vaxtında və keyfiyyətli ilkin tibbi yardım göstərilməsi, xəstəxanalara çatdırılması mühümdür”-deyən Sevinc Hüseynova vurğulayıb ki, Təcili və Təxirəsalınmaz Tibbi Yardım əhalinin sağlamlığının qorunmasında böyük rol oynayır:

“Xəstəliklər, travmalar, bədbəxt hadisələr zamanı, sürətlə inkişaf edən potoloji proseslər, ağır xəstəliklər orqanizmin həyatı vacib orqan və sistemlərində ağır pozulmalara gətirib çıxarır və həyat üçün çox böyük təhlükə yaradır. Bu baxımdan yol nəqliyyat hadisələri xüsusi yer tutur. Belə ki, hər il baş verən yol nəqliyyat hadisələri zamanı yüzlərlə insan həlak olur və ya ömürlük şikəst qalır”.