Məlum olduğu kimi, dünən Azərbaycan Yazıçılar Birliyinin (AYB) XIII qurultayı baş tutdu. Elə dünəndən bu günə də ölkə gündəmində davamlı müzakirə obyekti məhz qurultayda yaşananlarla bağlıdır.
Xatırladaq ki, AYB-nin sonuncu qurultayı 2014-cü ildə keçirilib. Xalq yazıçısı Anar 1987-ci ildən Birliyin sədridir.
Elchi.az xəbər verir ki, BAXCP sədrinin müşaviri, politoloq Azər Qasımov şəxsi Feysbuk hesabında sözügedən qurultayla bağlı fikirlərini bölüşüb:
“Aidiyyətim olmasa da, fikir bildirmək istəyirəm. Yazıçılar birliyinin sədri seçilmiş Anar müəllimin layiqli namizəd olmasına heç bir şübhəm və etirazım yoxdur.
Anar müəllim Azərbaycan ədəbiyyatının böyük nümayəndələrindən biridir. 35 ildir AYB-nin sədridir və sairə ilaxır.
Etirazım təbii ki, tək bu hadisəyə yox, ümümiyyətlə, əksəriyyətimizin uzun illər korifey sənətkar, şair, aktyor, müğənni və s. hesab etdiyimiz insanların yaşlandıqdan, hətta elə yaşlanmasa belə, hansısa fəaliyyətinin nəticəsindən sonra hörmətdən salınmasınadır. Bunu kim edir deyə bilmərəm, amma hesab edirəm ki, günah onları bu vəzifələrə təyin edənlərdə, buna şərait yaradanlarda və qismən özlərindədir.
Həmin insanlar cavanlıqlarında bir çox uğurlara imza atıb, xalqın nəzərində qalxdıqları yüksəklikləri yaşlandıqda tədricən itirirlər. Səbəb isə vəzifədir, onların fəaliyyətindən doğru yerdə istifadə edilməməkdir.
Tutaq ki, bu insanlar vəzifədə uzun illər normal fəaliyyət göstəriblər, amma indi yaşlanıblar, onların vəzifədə qalması açıq narazılıq və etiraz doğurur, həmin insanın avtoritetini aşağı salır. Dövlət bunu görməlidir. Xalqın mənəvi dəyəri hesab edilən bu insanların gözdən düşməsinə imkan verməməlidir. Həmin insanı istirahətə göndərməyin, fəaliyyətini dayandırmağın onun özündən çox xalq üçün lazım olduğunu bilməlidir. Çünki belə insanlar artıq yetişmir və ya az yetişir. Onların şəxsiyyəti və yaradıcılıq irsi Azərbaycan dövləti və xalqı üçün hələ uzun əsrlər lazım olacaq”.
Yeganə