“Qarabağ”ı daha bir futbolçu tərk edib.
Elchi.az Prosport.az-a istinadla xəbər verir ki, Marko Yankoviç Türkiyə Super Liqasına vəsiqə qazanmış “Çorum”a transfer olunub.
Onunla “2+1” illik müqavilə bağlanılıb. 30 yaşlı futbolçunun “Qarabağ” və “Zirə” arasında keçirilmiş yoxlama oyununda (4:3) görünməməsi də bu səbəbdən olub. “Çorum” 2027-ci ilin yayınadək müqaviləsi olan futbolçuya görə “Qarabağ”a transfer məbləği də ödəyib.
Yeri gəlmişkən, “Çorum”da “Qarabağ”ın sabiq bosniyalı qapıçısı İbrahim Şehiç də çıxış edir.
Qeyd edək ki, Monteneqro millisinin üzvü olan, Serbiya vətəndaşlığı da olan Marko Yankoviç ötən mövsüm “Qarabağ”da 44 matça çıxıb və 5 qol, 4 assistlə yadda qalıb. O, 2022-ci ilin yayında İsrailin “Hapoel” (Təl-Əviv) klubundan “Qarabağ”a qoşulmuşdu. “Qarabağ” artıq bu mövqeyə portuqaliyalı mərkəz yarımmüdafiəçisi Samuel Lobatunu transfer edib.
Onu da bildirək ki, Leandro Andradenin də Ukraynanın “Polissye” klubuna transfer olunacağı gözlənilir. Həmçinin, Kamilo Duranı Şotlandiyanın “Seltik” klubunun istədiyi bildirilir.
***
Türkiyə mediasında Superliqa təmsilçisi “Çorum”un “Qarabağ”ın futbolçusu Marko Yankoviçlə maraqlandığı və bununla bağlı danışıqlar apardığına dair xəbərlər yayılıb.
Elchi.az Qol.az-a istinadən xəbər verir ki, Ağdam klubu ilə müqaviləsi olan Yankoviç yeni mövsümdə də “Qarabağ”da qalacaq.
