Səudiyyə krallığı ABŞ prezidentinə istinadən Afrikada vəhhabiliyi yayır ; “WorldNetDaily (WND)”
saytı sensasional araşdırma dərc edib
Barak Obamanın Keniyadakı qohumları Amerikanın ilk qaradərili prezidentinin inauqurasiyasından üzü bəri ciddi işlər görüblər. Bu işlərin mahiyyəti ondan ibarətdir ki, Keniyadakı Obama nəslindən olanlar xristianların kəskin çoxluqda olduğu bu ölkəni sürətlə islamlaşdırmaq yolunu tutublar. Onlar ölkədə Şəriət adlanan İslam qanunlarını geniş yaymağa başlayıblar.
Bu barədə Amerikanın nəhəng media layihələrindən olan “WorldNetDaily (WND)” saytında geniş məqalə verilib. Mövzunun mahiyyətinə daha dərindən varmaq üçün bəzi statistik məlumatlara nəzər salaq.
Rəsmi məlumatlara görə, Şərqi Afrika ölkəsi olan Keniyanın 45 milyon əhalisi var. Onların 83 faizi xristiandır. Müsəlmanlarsa əhalinin cəmi 11 faizini təşkil edir. Böyük Britaniyanın müstəmləkəsi olmuş bu ölkə 1963-ci ildə müstəqillik qazanıb. Dünyanın ən korrupsiyalaşmış ölkələrinin “Transparency İnternational” tərəfindən hazırlanan cədvəlində Keniya bir qayda olaraq ən öndə gedən ölkələr sırasındadır…
“WND” saytında Cermor Korsi tərəfindən qələmə alınmış yazıda deyilir ki, ərəb araşdırıcı Valid və Teodora Şoebatlar bu kimi iddiaları xüsusi məruzədə sənədləşdiriblər. Orada olan bir sıra materiallar Qərbdə nümayiş olunmayıb.
Məsələn, Musa İsmayıl Obama, prezident Obamanın əmisi oğludur. O, ərəbdilli peyk TV-si olan “Al-Jazeera”yə geniş müsahibəsində bildirib ki, Səudiyyə Ərəbistanının kral ailəsi Obama tayfasının yaşadığı Siaya dairəsindəki Alego şəhəri yaxınlığındakı Kogelo kəndi ilə ciddi əlaqələr yaradıb və bu əlaqələr sürətlə inkişaf edir.
Musa Obama Keniyada islamın yayılması istiqamətində ciddi səylər göstərir. Bu isə Səudiyyədə olan varlı elitanın ən böyük arzularından biridir. Onların xəyalındakı odur ki, Keniyadakı müsəlman azlıq xristianların hesabına artaraq azlıqdan çoxluğa çevrilməlidir. Yəni, Keniya müsəlman dövləti olmalıdır.
Valid Şoebat qeyd edir ki, ərəbdlli “Al-Arab” qəzetindəki yazıda vurğulanır ki, Obama adı Keniyada islamın yayılmasında xüsusi önəm daşıyır. Valid Şoebat onu da bildirir ki, həmin yazıda ABŞ prezidenti Barak Obama “islama inanclı” müsəlman kimi təqdim olunur.
“Prezident Obamanın inauqurasiyasından sonra Keniyadakı Obama tayfasının müsəlman hissəsi bum yaşadı. Onlar bir gecənin içində ən kasıb pillədən ən varlı pilləyə sıçradılar. Onlar Qərbi Keniyada ən nüfuzlu nəslə çevrildilər, maliyyə toplamaq üçün qurduqları imperiya Səudiyyə Ərəbistanını da öz ağuşuna aldı” – araşdırıcı Valid Şoebatın hazırladığı məruzədə belə deyilir.
Musa telemüsahibəsində bildirmişdi ki, Səudiyyənin kral ailəsi ona və Sarah Obamanı Həcc ziyarətində iştirak etməsi üçün xüsusi dəvət göndərmişdi: “Bizi qarşılayanda yerə qırmızı xalça sərilmişdi. Bizi saray əhli qarşıladı və xüsusi mühafizə altında hava limanından ayrıldıq….”
Prezident Obama Səudiyyə kralı Abdullaha təzim edərkən. Dünyanın ən inkişaf etmiş 20 ölkəsinin zirvə görüşü. 2009-cu il
Beləliklə Keniyadakı Obama nəsli Səudiyyənin kral ailəsi ilə birlikdə fikirləşib yeni yol tapdılar. Prezident Obamanın ABŞ-da təhsillə bağlı çağırışından istifadə edərək Keniyada təhsili genişləndirməyə başladılar. Təhsillə bağlı görülən bu işlər şəriət qanunlarının və islamın təbliğinə xidmət etməyə başladı…
Hədəfə çatmaq üçün ABŞ prezidentinin nənəsi Sara Obama öz adına xeyriyyə institutu yaratdı. Az sonra bu institut “Sara Obama ananın Uşaqları Fondu” kimi tanınmağa başladı.
Bu fond öz ianələrinin 90 faizini ABŞ və Avropadan topladı. Fond bildirirdi ki, bu ianələr hesabına yetim və diqqətdən kənarda qalan uşaqlara humanitar yardım həyata keçirir. Fond həmçinin HIV/AIDS kimi dəhşətli viruslara yoluxmuş xəstə uşaqlara da əl tutur.
Valid Şoebat yazır ki, istənilən halda Musa İsmayıl Obamanın müsahibəsindəki Qərb aləmi üçün xoşagəlməz görünə biləcək məqamlar ingilis dilinə tərcümə zamanı kənara atılırdı.
Sara Fondunun əsas vəsaiti dul qalmış qadınlara və yetim uşaqlara yardıma sərf olunmadı. Buna baxmayaraq əsas pul kütləsi Səudiyyə Ərəbistanında şəriəti tədris edən güclü vəhhabi məktəblərinə axıdıldı.
“Bu cihadçı Keniyanın yeni fırıldağı idi. Prezident Obama öz nəslinin Keniyada gördüyü işlərdən xəbərsizdir. Musa Obama “Al-Jazeera” kanalına dedi ki, prezident Obama sevimli əmisi Seyid Hüseyn Obamanı Ağ Evlə hər hansı danışıqlar aparmaqda səlahiyyətli elan edib. Keniyadakı Obamalar da prezidentlə bu məsələdə razıdır” – Valid Şoebat yazır.
Seyid Hüseyn Obama hələ 2009-cu ildə Sara Obamanı Barak Obamanın inauqurasiyasında müşayiət etmişdi.
Prezident Obamanın nənəsi Sara Obama inauqurasiyaya qatılmağa gedərkən
Musa Obama Seyid Hüseynin yaxın adamı olaraq Sara ananın həm fondunun, həm də ailəsinin Keniyanın sosial müstəvisində əsas məsləhətçilərindən birinə çevrildi. Musa elə ərəb medialarını seçirdi ki, onların vasitəsi ilə varlı müsəlman ailələrindən maliyyə yardımı almaq olardı.
Musa Obama qonorar alaraq verdiyi müsahibələrdə belə bir şərt irəli sürülürdü ki, nəslin prezident Obama ilə hər hansı əlaqəsi ilə bağlı suallar verilməyəcək. Siyasi məsələlərlə də bağlı ötəri nələrisə soruşmaq olardı.
“Musa Obama “Al-Jazeera” vasitəsi ilə varlı ərəblərə eşitdirdi ki, Keniyanın müsəlman dövlətinə transformasiya üçün fondlara ehtiyac var və bu kimi işləri görmək onun missiyasıdır. Və bu işdə prezident Obamanın adının nüfuzu və Sara ananın fondunun görəcəyi işlər çoxdur”, Valid Şoebat belə yazır.
O, məruzəsində onu da bildirir ki, Sara ananın fondu Keniyada dünyəvi təhsil üçün elə bir iş görmədi. Dul qadınlara və yetim uşaqlara da onun ciddi yardım göstərməsindən danışmağa dəyməz. Musa Obama heç bir müsahibəsində Sara ananın yaratdığı fondun HİV virusuna yoluxmuş bir uşağa yardımından bir kəlmə də danışmayıb.
Əvəzində Səudiyyə Ərəbistanındakı Vəhhabi Şəriət Mərkəziləri, o cümlədən Mədinədəki İslam Universiteti, Məkkədəki Umm əl-Qura Universiteti, əl-Riyaddakı Məhəmməd ibn Səud adına İslam Universitetinə gedən gənclərə ciddi maliyyə dəstəyi verilib.
Etibarlı mənbə bildirir ki, Strateji Araşdırmalar üzrə Körfəz Məsələləri Mərkəzi vəhhabizmə söykənir. Onlar bu tədris müəssisələrinin “radikal ideyaları canına hopdurmuş Sələfi məktəbləri” kimi təqdim edirlər. Nəticədə vəhhabizm indi bahar çağını yaşayır…
Məruzənin başqa bir yerində Səudiyyə mediasına istinadən Valid Şoebat bildirilir ki, prezident Obamanın sevimli əmisi Seyid Hüseyn Obama “əl-Qaidə”nin də qatıldığı Müsəlmanların Dünya Liqasında iştirak edir.
Araşdırıcı fikrini əsaslandırmaq üçün rəsmi məlumatlardan sitat da gətirir: “Zati-ali, doktor Abdullah bin Əbdül Möhsün əl-Türki Müsəlmanların Dünya Liqasının sədri və Məkkədə fəaliyyət göstərən Aparıcı Alimlərin Məsləhət Şurasının üzvü kimi bazar ertəsi Seyid Hüseyn Obamanı qəbul edib. O, Keniyadan gəlmiş iş adamıdır, ABŞ prezidenti Barak Obamanın əmisidir. Bu şəxs Müsəlmanların Dünya Liqasının ziyarət edib. Seyid Hüseyn Obamanı bu ziyarətdə Səudiyyədə universitet təhsili almış Keniya vətəndaşları müşayiət edib”.
Araşdırıcı bildirir ki, Müsəlmanların Dünya Liqasının bir neçə üzvünün “əl-Qidə” ilə əməkdaşlıq etməsi bəlli faktdır. O da faktdır ki, bin Laden və “əl-Qaidə” dünyanın hər tərəfində ofisləri olan Müsəlmanların Dünya Liqası tərəfindən maddi dəstək alıb. Bu təşkilat onlar üçün bəzən sığınacağa da çevrilib.
“Al-Jazeera”yə müsahibəsində Musa Obama Məkkədəki Umm əl-Qura Universitetinə göndərilən tələbələrin neçə yola gətirilməsindən də danışır. Onu da bildirir ki, onun özü də ərəb dilini və Şəriəti Mədinədəki universitetdə öyrənib.
Musa deyir: “Mən və əmim Seyid Hüseyn Obama Məkkədəki Umm əl-Qura Universitetində olduq. Keniyadan bu universitetə göndəriləcək gənclərlə bağlı bir sıra məsələləri araşdırdıq”.
Valid Şoebat izah edir ki, Umm əl-Qura Universiteti vəhhabi təhsil sisteminin ən mükəmməl mərkəzi hesab olunur. Bu universitet onunla qürur duyur ki, onlar ilk dəfə Məhəmməd ibn Əbdülvahabın əsərlərini çap ediblər. O, İslamın ən güclü qolunun əsasını qoyub (vəhhabilik nəzərdə tutulur – E.H.)
Araşdırıcının aşağıda təqdim etdiyi fotolarda isə Musa İsmayıl və Seyid Hüseyn Obamaların Məkkədəki Umm əl-Qura Universitetindəki rəsmilərlə görüşü əks olunur.
Sağdan birinci Seyid Obama və onun yanındakı Musa Obama Məkkədəki Umm əl- Qura Universitetində
Sağdan birinci Umm əl-Qura Universitetinin rektoru Bəkir bin Əsas və Obamalar
Soldan birinci Seyid Obama və Umm əl- Qura Universitetinin rektoru Bəki bin Əsas
Sağdan birinci Umm əl- Qura Universitetinin rektoru Bəkir bin Əsas və Obamalar
Bu fotoları həmçinin Umm əl- Qura Universitetinin veb-saytında da görmək olar. Universitetin saytı bu görüşdən qürur duyduqlarını vurğulayaraq yazır: “Zati-aliləri, Umm əl- Qura Universitetinin rektoru Bəkir bin Əsas universitet şəhərciyində zati-aliləri ABŞ prezidenti Barak Obamanın əmisi Seyid Obamanı və ABŞ prezidentinin əmisi oğlu Musa Obamanı qəbul edib”.
Bildirilir ki, Obamaların yaratdığı fond o qədər uğurla işləyir ki, onlar artıq qalan gəncləri Qatara dini təhsil almağa göndərirlər.
“Təhsil almaq üçün bizim fonda müraciət edən gənclərə hər tərəfli yardım edilir, ona görə də bizə müraciətlərin sayı-hesabı yoxdur”, Musa Obama deyir.
“Al-Jazeera” Musa Obamadan müsahibə götürərkən soruşur ki, siz bütün tələbələri ərəb dili və Şəriət öyrənməyə göndərirsiniz. Buna cavab olaraq Musa bildirir ki, onlar bəzi gənclərə tibb və mühəndis təhsili almaq üçün də yardım ediblər.
“Al-Jazeera”nin cənab Musaya verdiyi başqa bir sual da diqqət çəkir.
– Qatara göndərdiyiniz tələbələrin əsas hissəsi nə öyrənəcək?
– Tələbələrin əksəriyyəti Şəriət elmini öyrənəcək. Çünki mən Qatarda olarkən dini təhsil verən mərkəzlərlə əlaqə yaratmışdım…
Elbəyi Həsənli, Sürix
Son şərhlər