Rabitə və Yüksək Texnologiyalar Nazirliyinin həbsdə olan sabiq aparat rəhbəri Vidadi Zeynalovun vəkili müvəkkilinin 43 milyonluq əmlakı ilə bağlı yayılan məlumatlara münsaibət bildirib.
Bu barədə musavat.com-a müraciət edən vəkil Ceyhun Yusifov bildirib ki, Vidadi Zeynalova məxsus olduğu deyilən və üzərinə həbs qoyulan əmlakların bir hissəsi sabiq aparat rəhbərinə məxsus deyil. Həmin əmlakların bir hissəsi isə Vidadi Zeynalov nazirlikdə aparat rəhbəri işləmədiyi dövrdə alınıb.
Əvvəlcə onu qeyd edək ki, Vidadi Zeynalov həbs edildikdən sonra istintaq dövründə ona məxsus olduğu bildirilən ümumi dəyəri 43 milyon manatdan çox olan 67 daşınmaz əmlaka məhkəmə qərarı ilə həbs qoyulub. Həmin əmlaklar sırasında villalar, torpaq sahələri, evlər yer alır. Əmlaklar Vidadi Zeynalovun, övladlarının, bacısının və digər yaxın qohumlarının adınadır.
Vidadi Zeynalovun vəkili Ceyhun Yusifov bu məsələyə münasibət bildirərkən deyir ki, üzərinə həbs qoyulan əmlakların bir hissəsi müdafiə etdiyi şəxsə məxsus deyil: “Bəlkə də əksər insanların nəsli-əcabətində bu qədər və ya daha çox əmlak var. Biz bundan narazıyıq ki, Vidadi Zeynalovun bütün qohumlarının adına olan əmlaklara həbs qoyulub. Hansı ki, həmin əmlakların Vidadi Zeynalovla heç bir əlaqəsi yoxdur. Bu da həmin şəxslərin hüquq və mənafelərinin pozulmasıdır. Məqsədli şəkildə bu qədər əmlaka həbs qoyulmasını düzgün hesab etmirik”.
Vəkil C.Yusifovun sözlərinə görə, üzərinə həbs qoyulan bəzi əmlaklar pay torpaq sahələridir. Onun dediyinə görə, siyahıda göstərilən əmlaklar arasında Vidadi Zeynalova və onun qohumlarına aid olmayan mənzil də var: “Üzərinə həbs qoyulan əmlaklardan biri Hövsanda olan 2 sot torpaq sahəsidir. Hansı ki, həmin torpaq sahəsi Vidadi Zeynalovun Qarabağ döyüşlərinin iştiraksıçı olmuş qardaşına 1995-ci ildə icra hakimiyyəti tərəfindən verilib. Yasamal rayonunda, Qurtqaşınlı küçəsində yerləşən binada olan mənzilə də həbs qoyulub. Həmin mənzil Vidadi Zeynalovun qaynınıdır və o, ailəsi ilə birlikdə həmin evdə yaşayır.
Həmçinin Yevlaxın Kövər kəndindəki 0,33 hektar torpaq sahəsinə də həbs qoyulub. Həmin əmlak pay torpağıdır və Vidadi Zeynalovun anasının adınadır. 67 əmlakın yer aldığı siyahıda Yasamal rayonu, M.Fətəli küçəsi, 107 saylı ünvanda yerləşən ümumi sahəsi 40.5 kvadratmetr olan mənzilə də həbs qoyulub. Həmin mənzilin Cəfərova Kəmalə Zeynal qızının adına olduğu göstərilir. Amma dəyəri 60 min manat göstərilən bu mənzilin kimə məxsus olduğu bizə məlum deyil. Yəni belə bir mənzilin olması Vidadi Zeynalova nə də onun yaxınlarına məlum deyil”.
Vəkil Vidadi Zeynalovun Rabitə və Yüksək Texnologiyalar Nazirliyində işləmədən öncə də olan əmlaklarına həbs qoyulmasından da narazı olduqlarını qeyd edib: “Vidadi Zeynalovun dədə-baba evi 1947-ci ildə Kövər kəndində tikilib. Həmin evə də həbs qoyulub. Həmçinin taxıl əkilməsi üçün uzun müddətli icarəyə götürülən torpaq sahələrinin də üzərinə həbs qoyulub. Amma həmin torpaq sahələri əkin üçün faydalı idi və əkilirdi də. Bu işlə də vidadi Zeynalovun bacısı oğlu məşğul olurdu. Burada qəbahət nə var idi? Torpaq sahələri əkib-becərlirdi”.
Qeyd edək ki, Vidadi Zeynalov 2015-ci ilin noyabr ayının 13-də həbs edilib.
O, qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə qabaqcadan razılaşmaqla həmin strukturlar tərəfindən işlərin görülmədiyi, tam yerinə yetirilmədiyi, avadanlıqlar alınmadığı, istifadə olunan avadanlıqların, xidmətlərin qiymətlərinin isə 4-5 qat şişirdilməsi və digər üsullarla işlərin və xidmətlərin guya yerinə yetirilməsini özlərinin himayə etdikləri, yaxın münasibətdə olduqları şəxslərin adına olan özəl şirkətlər tərəfindən saxta sənədlər əsasında rəsmiləşdirməsini təmin etməklə müvafiq müəssisələrin ayrı-ayrı banklardakı hesabına köçürülmüş 73 milyon 590 min manat pul vəsaitinin nağdlaşdırılmaqla mənimsənilməsini və israf edilməsinin təşkilində təqsirləndirilir.
Son şərhlər