Türkiyə Silahlı Qüvvələri (TSK) növbəti dəfə PYD/PKK terror təşkilatının Suriyanın Hələb şəhərinin Azez qəsəbəsindəki mövqelərinə artilleriya zərbələri endirib.
APA-nın məlumatına görə, bu barədə Türkiyənin rəsmi Anadolu Agentliyi məlumat yayıb.
Məlumatda qeyd edilib ki, ərazidə atəş səsləri eşidilir.
Qeyd edək ki, Türkiyə Silahlı Qüvvələri dünən də PYD qruplaşmasının Suriyanın şimalındakı mövqelərinə artilleriya zərbələri endirib.
Eyni zamanda Türkiyənin baş naziri Əhməd Davudoğlu bir neçə tələb səsləndirib. Onun sözlərinə görə, YPG dərhal Azez qəsəbəsinin ətrafını tərk etməli və bura bir daha yaxınlaşmamalıdır.
“Onlar, həmçinin, humanitar dəhlizi açmalı və bir daha ora yaxınlaşmamalı, “Minnak” aeroportundan Türkiyə və Suriya müxalifətinə qarşı istifadə etməməlidirlər. Bu aeroport dərhal azad edilməlidir”- deyə, Davudoğlu bildirib.
Bu gün isə terror qruplaşmasının siyasi qanadı olan PYD-nin həmsədri Salih Müslim rəsmi Ankaranın tələblərini rədd etdiklərini açıqlayıb.
“Reuters”in xəbərinə görə, Müslim “suriyalıların Türkiyənin müdaxiləsinə qarşı dirənəcəklərini” bildirib.
“RİA Novosti”nin məlumatına görə isə ABŞ prezidenti Barak Obama və Rusiya prezidenti Vladimir Putin Suriyadakı son vəziyyəti müzakirə ediblər.
Telefon danışığında Putin Obamaya terrora qarşı birgə mübarizə aparılmasının vacibliyini bildirib.
Həmçinin, prezidentlərin Münhen Təhlükəsizlik Konfransında Suriya ilə bağlı qəbul edilmiş qərarların həyata keçirilməsi ilə bağlı həmfikir olduqları qeyd edilib.
Son şərhlər