ABŞ Prezidenti Donald Tramp ABŞ Müdafiə Nazirliyinə (Pentaqon) enerji alışında kömürlə işləyən elektrik stansiyaları ilə birbaşa işləməyi tapşıran bir sərəncam imzaladı.
Elchi.az xəbər verir ki, Ağ Evdə keçirilən mərasimdə Prezident Tramp ölkədə kömür istehsalını artırdıqlarını və bunun iqtisadiyyat üçün vacib olduğunu izah etdi.
İstehsala verdiyi töhfələrə görə kömür istehsalçıları tərəfindən mükafatlandırılan Tramp bununla fəxr etdiyini və kömürün Amerika iqtisadiyyatında çox vacib bir yerə sahib olduğunu söylədi.
ABŞ Prezidenti dedi: “Buna görə də Müdafiə Nazirliyinə yeni elektrik alışı müqavilələrində kömürlə işləyən elektrik stansiyaları ilə birbaşa işləməyi və elektrik enerjisini daha etibarlı şəkildə təmin etməyi tapşıran bir sərəncam imzalayacağam. Artıq ordu vasitəsilə çoxlu miqdarda kömür alacağıq və bu, daha ucuz və daha effektiv olacaq.”
ABŞ-ın Paris İqlim Sazişindən çıxmasını çox haqlı əsaslarla müdafiə edən Tramp bildirib ki, “(Co) Bayden və radikal solçular kömürdən imtina etmək istəyirdilər. Mən bu administrasiyanın ilk günündə kömürə qarşı müharibəyə son qoydum. Biz ədalətsiz və birtərəfli Paris İqlim Sazişindən çıxdıq. Biz heç kimin 10 sent ödəməli olmadığı 1 trilyon dollar ödəyirdik”. O, vəzifəsinin ilk ilində 74 kömürlə işləyən elektrik stansiyasının bağlanmasının qarşısını aldığını və şirkətlərə yeni kömürlə işləyən elektrik stansiyaları açmaq üçün lisenziyalar verəcəyini izah edib. Daha sonra mədənçilərlə şəkil çəkdirən və mükafatını alan Tramp İsrail Baş naziri Binyamin Netanyahu ilə qapalı görüşü ilə bağlı jurnalistlərin suallarını cavablandırmadan otaqdan çıxdı.
Şayəstə
