“Qazprom”la imzalanan son müqavilə iqtisadi cəhətdən uduzulmuş razılaşmadır.
Axar.az xəbər verir ki, bunu “Rustavi-2” televiziyasına müsahibəsində Gürcüstanın İqtisadiyyat naziri Georgi Qaxariya söyləyib.
“İqtisadi cəhətdən biz uduzuruq. Bu müqavilə iqtisadi baxımdan qələbə deyil. Amma bizim kommersiya qiymətinə qaz tədarük etməyi öhdəliyinə götürən strateji tərəfdaşımız Azərbaycan olduğuna görə, rus qazından asılılığımız sıfıra bərabər olacaq”, – deyə o bildirib.
Qeyd edək ki, Tiflislə “Qazprom” arasında yeni qaz müqaviləsi imzalanacaq. Müqaviləyə əsasən, Rusiya bundan sonra Gürcüstan ərazisindən keçərək Ermənistana gedən boru kəmərinə görə ödənişi pulla həyata keçirəcək. Üstəlik, Tiflis Rusiyadan əlavə qaz almaq imkanına sahib olacaq. Moskva isə bu qazı Tiflisə 215 dollara yox, 185 dollara satacaq. Hələlik Gürcüstan hökuməti tranzit haqqının nə qədər olacağını söyləmir və yalnız bu qiymətin Avropada ən bahalı tranzit qiymətlərindən biri olduğunu deyir.
Tiflis 2016-cı il 31 dekabra qədər Ermənistana Rusiyadan gedən qazın ümumi həcminin 10%-ni tranzit qarşılığında əldə edirdi.
Bir müddət öncə Gürcüstan Prezidenti Georgi Marqvelaşvili də “Qazprom”la imzalanan müqaviləyə qarşı çıxmışdı.