Somalidə Birləşmiş Millətlər Təşkilatına məxsus 9 sərnişini daşıyan helikopter terror qruplaşmasının Əl-Şəbabın nəzarətində olan bölgəyə təcili eniş etdikdən sonra ələ keçirilib.
Elchi.az xəbər verir ki, “New York Times”ın adı açıqlanmayan iki Somali rəsmisinə istinadən verdiyi məlumata görə, helikopterdəki sərnişinlərdən altısı əsir götürülüb, ikisi qaçıb, biri isə öldürülüb. Rəsmilərdən biri sərnişinlər arasında əcnəbilərin olduğunu, lakin onların milliyyətinin məlum olmadığını bildirib.
BMT-nin Somalidəki Dəstək Ofisinə bağlı helikopter çərşənbə günü Somalinin mərkəzindəki Galqaduud bölgəsinə enib. Helikopterin niyə yerə enmək məcburiyyətində olduğu hələlik bəlli deyil. Rəsmilərdən biri bildirib ki, qaçan iki sərnişinin taleyi hələlik məlum deyil.
BMT-nin Somalidəki Dəstək Ofisi Afrika İttifaqının Keçid Missiyasına və ölkədəki 19 mindən çox üzvü olan sülhməramlı qüvvələrə maddi-texniki dəstək verir. Bu dəstəyə ərzaq və yanacaq daşınması, quru və hava nəqliyyatı, həmçinin zərərçəkmişlərin təxliyəsi daxildir.
Ərəbcə “Gənclik” mənasını verən “Əş-Şəbab” on ildən artıqdır ki, Somalidə təxribat törədir, BMT-nin dəstəklədiyi federal hökuməti devirmək və onun yerinə şəriət əsaslı dövlət qurmaq istəyir. ABŞ və Somali rəsmilərinə görə qruplaşmanın 7-12 min yaraqlısı var. Təşkilat nəzarəti altında olan ərazilərdə qəsb və vergi yolu ilə ildə təxminən 120 milyon dollar qazanır.
Prezident Həsən Şeyx Mohamud 2022-ci ildə hakimiyyətə gəldikdən sonra qrupu həm hərbi, həm də maliyyə cəhətdən məhv etməyə çalışır.
Somali rəsmiləri və təhlükəsizlik rəsmilərinin bildirdiyinə görə, o, vertolyotun düşdüyü Somalinin cənub-mərkəzi də daxil olmaqla bölgələrə qoşun yerləşdirib və havadakı Amerika pilotsuz təyyarələrinin və yerdəki yerli qəbilə milislərinin köməyi ilə onlarla kiçik şəhər və kəndi azad edib.
Bununla belə, Əl-Şəbab bu hücuma qarşı mübarizəni davam etdirib və ölkə daxilində təhlükəsizlik qüvvələrinə və mülki şəxslərə qarşı çoxsaylı hücumlar həyata keçirib.
Şayəstə Hüseynova
Son şərhlər