Serbiya prezidenti Aleksandar Vuçiç İsrailin İrana hücumları ilə başlayan münaqişədən sonra İsrailə sursat satışının dayandırıldığını açıqlayıb.
Elchi.az xəbər verir ki, Serb Baş Qərargahının paytaxt Belqradda keçirilən genişləndirilmiş kollegiya iclasından sonra açıqlama verən Vuçiç ölkəsinin həm İsraili, həm də İranı dost olaraq gördüyünü bildirib.
Prezident Vuçiç İranla münaqişədə olan İsrailə sursat satışını dayandırdıqlarını bəyan edib.
Yaxın Şərqdə sülh istədiklərini ifadə edən Vuçiç, “İsrail də, İran da bizim dost ölkələrimizdir. Burada yəhudilərə hər zaman hörmət edilib. Hər iki xalq bizim dostumuzdur” deyib.
Vuçiç ABŞ-ın İrandakı nüvə obyektlərinə hücumlarına da münasibət bildirib və deyib:
“Beynəlxalq hüquq açıq şəkildə pozulub. Artıq ədalət və qaydalar yoxdur. Qərb nə Rusiyaya, nə də kiməsə ərazi bütövlüyü ilə bağlı mühazirə oxuyacaq? Hamı bu qaydaları pozub. Dünya sözün əsl mənasında xaosa düşür. İndi hamı elə davranır ki, sanki hamıya hücum etmək hüququ var. Dəlilik bütün dünyaya yayılıb. Güvənmək üçün heç kim qalmayıb”.
Vuçiç Serbiya ordusunu gücləndirmək istədiklərini və son 10 ildə bu istiqamətdə mühüm işlər gördüklərini qeyd edib.
Serbiyada məcburi hərbi xidmətə başlayacaqlarını bildirən Vuçiç peşəkar əsgərlərin şəraitinin yaxşılaşdırılması üçün çalışdıqlarını da əlavə edib.
Nuranə Məmmədova
