Samuxun Sərkar kənd musiqi məktəbinin müdiri Səadət Fərhad qızı Məmmədbəyovan;n korrupsiya xarakterli əməlləri haqda redaksiyamıza məktublar daxil olub. Həmin məktubların birinin müəllifi S.Məmmədbəyovanın keçmiş qudası Elman Hüseynovdur. Gəncə şəhər sakini Elman Hüseynov redaksiyamıza yolladığı məktubunda korrupsiya faktlarını sadalamaqla yazır: “Bunları deyəndə deyir ki, mənə nə edəcəklər, pulunu verirəm gedirlər. Hətta kimə nə qədər verir, onu hamı bilir. O deyir ki, mən korrupsiya vasitəsi ilə pul qazanmasam, adlarını çəkdiyin yüksək vəzifəlilərin pulunu haradan alım verim?”
Səadət Məmmədbəyovanın korrupsiyada ittiham edən E.Hüseynov belə bir məlumatı da diqqətə çatdırır: “”Əminliklə deyə bilərm ki, Səadət Məmmədbəyova 2007-ci ildə Müəllimlər İnstitunun Gəncə filialından aldığı saxta AKQ 087826 nömrəli diplomla müdir işlədiyi kimi həmin saxtalıq və riyakarlıqla oğlumla qızını ayırdı”.
E.Hüseynov yazır ki, keçmiş gəlini Şəms Hüseynova savadsızdır, notları belə tanımır, pianoda ifa belə edə bilmir, amma yüksək maaşla pianodan dərs deyir: “Anası onu da öz saxta əməllərinə qatmışdır. Belə ki, öz saxta diploma kimi bir saxta diplomu da qızına almışdır.2011-ci ildə Gəncə Musiqi Texnikumundan BB 118511 nömrəli diplom saxtadır. Həmin diplomla onu da öz yanında yüksək dərs saatı ilə işə qəbul etmişdir. Şəms Hüseynova adi notu üzündən çala bilmək iqtidarında deyil. Ola ki, tələbə hazırlaya! “İşlədiyi müddət” ərzində özü qızının maaşını alır. Qızı kimi bacısı qızı Abbasova Aysel Sahib qızı da saxta diplomla (BB 093918) işləyir. Çantasında Salman Nağıyevin, Alim İbrahimovun, Aytən Alməmmədovun, Rövşən Əsgərovun, Babək Hüseynovun, Nigar Salmanovanın maaş kartlarını gəzdirir. Onların maaşları bankomatlardan şəxsən özü çıxarır. Hətta uzun müddət Rusiyada yaşayan Lalə Şahismayıl qızı Xeyirxəbərovanın maaş kartına keçən 427 manat pulu mənimsəyir”.
Digər bir müraciətdə isə yazılır: “Səadət müəllimə özü saxta diplomla hazırda adı gedən təhsil müəssisəsində müdir vəzifəsində çalışır. 2007-ci ildə Gəncə şəhərində yerləşən Müəllimlər institutundan AKQ 087826 saylı saxta diplom əldə etmişdir. Səadət Məmmədbəyovanın həmin sənəddən istifadə etməsi, adları məktəbdə gedən, amma faktiki olaraq işləmiəyən şəxslərin adına əmək haqqı yazaraq mənimsəməsi, uşaqların sayını artırmaqla sinif yaratması, bunun da nəticəsində külli miqdarda pulu mənimsəməsi onun Azərbaycan Respublikası CM-nin 308-ci maddəsi yəni vəzifədən sui-istifadə, 320-ci maddəsi yəni saxta sənəd əldə etmə və saxta sənəddən istifadə etmə, 313-cü maddəsi yəni vəzifə saxtakarlığı, 179-cu maddəsi yəni dövlət əmlakını mənimsəmə kimi cinayət əməllərini törətməsinə dəlalət edir.
Müdirin qızı Məmmədbəyova Şəms Elbrus qızı Gəncə Musiqi Texnikumunu 2011-ci ildə bitirməsi barədə BB-11N2İ18511 saylı saxta diplom əldə edərək hazırda musiqi məktəbində işləyir. Məmmədbəyova Şəmsin saxta sənəd əldə etməsi və həmin sənəddən istifadə edərək müəllim işləməsi də Azərbaycan Respublikası CM-nin 320-ci maddəsinin tərkib əlamətini yaradır. Bu da Korrupsiyaya qarşı Mübarizə haqqında qanunun tələblərinə ziddir. Belə ki, həmin Qanunda qeyd olunduğu kimi yaxın qohumluq münasibətlərində olan qohumların rəhbər-işçi kimi işləməsi qadağandır.
Bundan əlavə olaraq dərs hissə müdiri Gəncə musiqi kollecindən verilmiş BB-11N2 108873 saylı saxta diplomla çalışan Həsənova Ruhanə Sabiq qızıdır.
Müəllim vəzifəsində çalışan Abbasova Aysel Sahib qızı isə Gəncə Musiqi Texnikomunu 2009-cu ildə saxta diplomla bitirmişdir. Diplomun seriyası belədir: BB-11N2093918.
Faktiki məktəbə gəlməyən müəllimlərin siyahısı aşağıdakılardır: Nağıyev Salman, İbrahimov Alim, Alməmmədova Vəsilə, Əsədova Pərvanə, Hacıyev Namiq, Əliyev Şaiq, Məmmədova Aytən, Əsgərov Rövşən, Hüseynov Babək, Salmanova Nigar. Adları sadalanan müəllimlərin aylıq əmək haqlarını müdir şəxsən özü bankomatlardan çıxardır.
Nağıyev Salman, Əsədova Pərvanə və Əliyev Şaiqin uzun illərdir əmək haqqı kartlarını bankomatdan çıxarılmasına diqqət yetirsək, Azərbaycan Beynəlxalq Banka sorğu verilsə, pulun kimin tərfindən bankomatdan çıxarıldığı açıq aşkar görünər. Belə ki, bildiyimiz kimi, kartı bankomata daxil edib pulu məxaric edərkən həmin bankomat tərəfindən kartı daxil edən şəxsin avtomatik şəkili çəkilir. Bu zaman pulun məktəbin direktoru Səadət müəllimə tərəfindən götürüldüyü aşkar olunacaq.
Məktəbdə ştat üzrə 295 şagird təhsil alındığı bildirilir. Lakin həqiqətdə isə bu belə deyildir. Musiqi məktəbində faktiki173 nəfər şagird təhsil alır. Buna sübut olaraq Həzrətov Orxan Vidadi oğlunu göstərmək olar ki, həmin şagird hazırda Sumqayıt Musiqi Kollecinin truba aləti sinifində təhsil alır”.
Samux rayonu Kolayır kəndində yaşayan Məmmədova Günay Duman qızı S.Məmmədbəyovanın əməlləri ilə bağlı baş prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevə müraciət ünvanlayıb. G.Məmmədova müraciətində yazır:
“Hörmətli Kamran müəllim,
Sərkar kəndində yerləşən uşaq-musiqi məktəbində xor-dirijor müəllimi vəzifəsində işləyirəm. Həmin məktəbin direktoru Məmmədbəyova Səadət Fərhad qızının cinayət xarakterli əməlləri ilə bağlı sizə müraciət edirəm. Belə ki, direktor S.Məmmədbəyova vəzifəsindən sui-istifadə edərək rəhbərlik etdiyi məktəbdə qanunsuzluqlara yol verir. Qanunsuz yollarla diplom əldə etmiş şəxsləri məktəbə işə qəbul edir, onlarla şəxsin adını məktəbdə müəllim kimi qeyd edərək, həmin müəllimlər işə gəlmədikləri halda onlara yüksək əmək haqqı yazdırır və dövlət pulunu külli miqdarda mənimsəyir. Mən hazırki müraciətimə 2015-2016-cı tədris ili üçün tarifləşmə cədvəlini əlavə edirəm. Həmin cədvəl üzrə araşdırma aparılsa məktəbdə faktiki olaraq dərs keçməyən, lakin adına dərs yükü yazılan müəllimlərin olması aşkar olunar. Cədvəldə adları qeyd olunan Nağıyev Salman, İbrahimov Alim, Məmmədbəyova Şəms, Alməmmədova Vəsilə, Əsədova Pərvanə, Hacıyev Namiq, Əliyev Şaiq, Əmrahov Elnur, Məmmədova Aytən, Əsgərov Rövşən, Hüseynov Babək, Hacıyev Şahin, Məmmədov Elçin, Salmanova Nigar, Həsənova Gülnarə “ölü kadrlardır” və məktəbdə işləmədikləri halda adları müəllim kimi saxlanılır. Onların əmək haqqı kartları da direktor və onun qohumlarındadır. Həmin müəllimlərin dərs saatlarının formalaşması üçün faktiki olaraq məktəbdə təhsil almayan şəxslər şagird siyahısına əlavə olunmuşdur.
Direktor Səadət Məmmədbəyova korrupsiya ilə mübarizə haqqında qanunvericiliyin tələblərini də kobud şəkildə pozaraq yaxın qohumlarını, o cümlədən qızı Şəms Məmmədbəyovanı, qardaşı qızları Nərgiz Həsənovanı, Lalə Həsənovanı, bacısı qızı Aysel Abbasovanı, dayısı qızı İlhamə Quliyevanı işə götürmüş, onların da adına yüksək dərs saatları yazmaqla, yüksək maaşlı işlə təmin etmişdir. Eyni zamanda yaxın qohumu Həsənova Ruhanə Sabiq qızını məktəbin dərs hissə müdiri vəzifəsinə təyin etmişdir.
S.Məmmədbəyova sinifdə şagirdlərin sayının stabil saxlanması üçün kollecdə təhsil alan Həsrətov Orxan Vidadi oğlunun da adını şagird kimi skripka sinfində saxlamışdır. Həmin sinifin müəlliməsi Pərvanə Mustafayevadır.
Hörmətli Kamran müəllim,
Mən uzun illərdir ki, qeyd olunan məktəbdə müəllimə işləyirəm. Məktəb direktorunun yuxarıda qeyd olunan qanunsuz hərəkətlərə yol verməsi, mənim və məndən başqa bir çox müəllimlərin hüquqlarını pozması artıq dözülməz həddə çatıb. Hər ay bütün müəllimlərin əmək haqlarından qanunsuz pul tutulmaları aparır. Direktor rayonda olan havadarlarına arxayın olaraq mənə və müəllimlərə heç bir əhəmiyyət vermir, bizi işdən çıxaracağı ilə hədələyir. Açıq şəkildə bildirir ki, mən heç kimdən qorxmuram, çünki hamıya haqq verirəm. Direktor məktəbi öz şəxsi mülkü kimi idarə edir. Bir rəqəmi diqqətinizə çatdırım ki, direktor saxta yollarla 1 ay ərzində 10 min manatdan artıq pulu mənimsəyə bilir və bu hər ay baş verir.
Hazırda məktəbdə maliyyə yoxlaması aparılır. S.Məmmədbəyova müəllimləri yığıb iclas edib və bildirir ki, maliyyəyə 25 min manat pul verməliyəm, həmin pulları müəllimlərdən yığacağam. Kimin pulu yoxdursa, sələmlə alsın, amma gətirib çatdırsın. Direktorun tələbi odur ki, fevral ayının əmək haqqını yığıb ona verək. Mən və bəzi müəllimlər bununla razılaşmırıq. Həmin müəllimlər direktordan qorxduqlarına görə şikayət etməkdən çəkinirlər. Amma məktəbdə Korrupsiyaya qarşı mübarizə idarəsinin əməkdaşları tərəfindən araşdırma aparılsa müəllimlərin hamısı qeyd olunan cinayət faktlarını təsdiq edərlər. Ona görə də Sizdən xahiş edirəm ki, müraciətimin araşdırılması üçün müvafiq sərəncam verəsiniz, ərizədə qeyd olunan cinayət faktlarını mənim iştirakımla yerində yoxlayasınız və direktor S.Məmmədbəyovanı cinayət məsuliyyətinə cəlb edəsiniz.
“Yeni Müsavat” əməkdaşı məsələ ilə bağlı S.Məmmədbəyovanın da mövqeyini öyrənib. S.Məmmədbəyova deyib ki, keçmiş qudasının onun barəsində şikayət yazması haqda məlumatsızdır. Günay Məmmədovanın şikayətlərinə gəlincə isə məktəb direktoru bunları bildirib: “Günay Məmmədova barəmdə yazdığı şər-böhtana görə məhkəməyə vermişdim. Məhkəmədə dediklərinin şər-böhtan olduğu təsdiqləndi, humanistlik edib onun həbsini tələb etmədim. O, məndən pul tələb edirdi”.
S.Məmmədbəyova deyib ki, şikayətlərdə sadalanan faktları Samux Rayon Prokurorluğu araşdırıb və təsdiqini tapmayıb.
Son şərhlər