Səudiyyə Ərəbistanının Mülki Müdafiə Baş İdarəsi ölkə daxilindəki altı məntəqədə yarana biləcək təhlükələrlə bağlı xəbərdarlıq yayıb.
Elchi.az xəbər verir ki, idarənin “X” (əvvəlki adı ilə Twitter) sosial şəbəkə platformasındakı hesabında dərc olunan açıqlamada Ciddə, Yanbu, Taif və Əl-Ula əyalətləri, həmçinin Abha şəhəri və Cazan bölgəsində mümkün fövqəladə hallarla bağlı xəbərdarlıq edilib.
Açıqlamada vətəndaşların və sakinlərin təhlükəsizliyini və əmlaklarının qorunmasını təmin etmək məqsədilə fövqəladə vəziyyət protokollarına riayət etməsinin, həmçinin səlahiyyətli orqanların təlimat və xəbərdarlıqlarını diqqətlə izləməsinin vacibliyi vurğulanıb.
Konkret təhlükənin mahiyyəti və ya təfərrüatları barədə məlumat verilməyib.
Daha sonra Mülki Müdafiə Baş İdarəsi tərəfindən yayılan növbəti açıqlamada Ciddə, Yanbu, Taif və Əl-Ula əyalətləri, Abha şəhəri və Cazan bölgəsindəki təhlükənin aradan qalxdığı bildirilib.
Husilər Səudiyyə Ərəbistanının rəhbərlik etdiyi Ərəb Koalisiyası tərəfindən həyata keçirilən hərbi əməliyyatlara cavab olaraq tez-tez Səudiyyə Ərəbistanının sərhəd bölgələrini və cənub əyalətlərini hədəf alırlar.
Bölgədəki hərbi obyektlər və mühüm infrastruktur qurğuları zaman-zaman Yəmən sərhədindən buraxılan pilotsuz uçuş aparatları (PUA) və ballistik raketlərin hücumlarına məruz qalır.
Şayəstə
